ԵՐԵՎԱՆ, 7 մարտի – Sputnik. ԱՄՆ նախագահ Դոնալդ Թրամփը հայտարարել է, որ Իրանը դարձել է Մերձավոր Արևելքի «պարտվողը» և այդպիսին կլինի դեռ երկար տասնամյակներ, մինչև չհանձնվի կամ ամբողջովին չկործանվի:
«Նրանք (Իրանը — խմբ.) փորձում էին գրավել Մերձավոր Արևելքը և կառավարել այն։ Սա հազարավոր տարիների ընթացքում առաջին դեպքն է, երբ Իրանը պարտվել է հարևան մերձավորարևելյան երկրներին։ Նրանք ասացին. «Շնորհակալություն, նախագահ Թրամփ»։ Ես պատասխանեցի. «Խնդրեմ»։ Իրանը այլևս Մերձավոր Արևելքի «կռվարարը» չէ․ այժմ այն Մերձավոր Արևելքի «պարտվողն» է և այդպիսին կմնա դեռ շատ տասնամյակներ, մինչև չհանձնվի կամ, առավել հավանական է, ամբողջովին չկործանվի», - գրել է Թրամփը Truth Social սոցիալական ցանցում։
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: