ԵՐԵՎԱՆ, 7 մարտի – Sputnik․ «FlyDubai» ավիաընկերության Դուբայ-Երևան թռիչքն արդեն երկու անգամ հետաձգվել է՝ օդանավակայանի մոտակայքում ԱԹՍ-ի ընկնելու հետևանքով։
Sputnik Արմենիայի հետ զրույցում ուղևորներից մեկը հայտնեց, որ արդեն մոտենում էին ավտոբուսին, որն իրենց պետք է տաներ դեպի օդանավ՝ նստեցման համար, երբ լսվեց պայթյունը։
Թռիչքը նախատեսված էր 06։55, այն մի անգամ հետաձգվեց 9։30, հիմա արդեն՝ 15։00։
«Զվարթնոց» օդանավակայանի առցանց չվացուցակի համաձայն՝ օդանավը Երևանում վայրէջք կկատարի 21։35-ին։
Նշենք, որ բարդ իրավիճակի և փակ օդային տարածքների պատճառով հիմա Դուբայ-Երևան թռիչքը տևում է մոտ 6 ժամ՝ նախկին 3-ի փոխարեն։
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: