ԵՐԵՎԱՆ, 6 մարտի - Sputnik. ԱՄՆ նախագահ Դոնալդ Թրամփն Իրանից անվերապահ կապիտուլյացիա է պահանջել։ Համապատասխան հայտարարությունը նա հրապարակել է սոցիալական ցանցերում՝ միաժամանակ խոստանալով «Իրանը կրկին մեծ դարձնել»:
«Իրանի հետ ոչ մի գործարք չի լինի, բացի անվերապահ կապիտուլյացիայից։ Դրանից և արժանի առաջնորդի (կամ առաջնորդների) ընտրությունից հետո մենք մեր շատ հրաշալի և շատ խիզախ դաշնակիցների և գործընկերների հետ միասին անխոնջ կաշխատենք, Իրանը դուրս կբերենք անդունդի եզրից և կդարձնենք այն տնտեսապես ավելի զարգացած, ուժեղ և հաջողակ, քան երբևէ»,- գրել է Թրամփը:
Նրա խոսքով՝ Իրանը «կարող է մեծ ապագա ունենալ»։
Հիշեցնենք` ԱՄՆ–ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին ու նրա կինը, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: