ԵՐԵՎԱՆ, 3 մարտի – Sputnik․ Զեղծարարները ներկայանում են Կենտրոնական բանկի անունից և կեղծ նամակների ու զանգերի միջոցով հորդորում ֆինանսական միջոցները փոխանցել այլ հաշիվների։ ՀՀ ԿԲ մամուլի ծառայությունը հաղորդագրություն է տարածել՝ ներկայացնելով վերջերս տարածված ֆինանսական զեղծարարության նոր սխեման։
«Տեղեկացնում ենք, որ ՀՀ կենտրոնական բանկը երբևէ նման հայտարարություններ և զանգեր չի իրականացնում, հաղորդագրություններ չի ուղարկում և չի իրականացնում ֆիզիկական անձանց բանկային սպասարկում»,- զգուշացնում է ԿԲ-ն։
Շեշտում են՝ եթե որևէ եղանակով կապ են հաստատում և Կենտրոնական բանկի անունից խնդրում կամ պարտադրում գումար փոխանցել ավելի «պաշտպանված» կամ «հատուկ» հաշիվների, որևէ մեկին չփոխանցել անձնական կամ բանկային տվյալներ և անմիջապես կապ հաստատել սպասարկող բանկի հետ:
ԿԲ-ն հրապարակել է նաև մի քանի կեղծված փաստաթղթերի օրինակներ, որոնցով զեղծարարները փորձել են իբրև թե ապացուցել, որ Կենտրոնական բանկից են։
Նշենք, որ այսօր հերթական անգամ ՀՀ քննչական կոմիտեի մոտ բողոքի ակցիա են իրականացնում ֆինանսական զեղծարարություններից տուժած ՀՀ քաղաքացիները։