ԵՐԵՎԱՆ, 3 մարտի - Sputnik. Այսօրվա ընթացքում Իրանից ՀՀ տարածք է մուտք գործել 31 ՌԴ քաղաքացի: Այս մասին հայտնում է Հայաստանում Ռուսաստանի դեսպանատան մամուլի ծառայությունը։
Մուտքն իրականացվում է Նուրդուզ-Ագարակ անցակետով՝ սովորական կարգով:
Ինչպես ավելի վաղ հայտնել էր Հայաստանում Ռուսաստանի դեսպանատունը, մուտքն իրականացվում է առանց նախնական ծանուցման, վավեր արտասահմանյան կամ ներքին անձնագրերով:
Հայաստանում Ռուսաստանի դեսպանատան հյուպատոսական բաժնում գործում են տեղեկատու հեռախոսահամար (+374 (10) 589 843), ինչպես նաև էլեկտրոնային փոստ՝ consarmenia@mid.ru. Քաղաքացիների կյանքին և առողջությանը սպառնացող արտակարգ իրավիճակների դեպքում կապի համար հասանելի է դեսպանության հետևյալ հեռախոսահամարը՝ +374 (77) 495 001:
Հիշեցնենք` չնայած Ժնևում Օմանի միջնորդությամբ Վաշինգտոնի և Թեհրանի միջև իրանական «միջուկային դոսյեի» շուրջ բանակցություններին, ԱՄՆ-ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Հորմոզգան նահանգի Մինաբ քաղաքում աղջիկների համար նախատեսված «Շաջարե Թայեբե» տարրական դպրոցի ռմբակոծությունից զոհվել է 170 երեխա ու աշխատակից։ Երկրում 40-օրյա սուգ է հայտարարվել:
Իրանը պատասխան հրթիռային հարվածներ է հասցնում Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: