ԵՐԵՎԱՆ, 2 մարտի - Sputnik. Կասեցվել է Երևանի Թումանյան 19 հասցեում գտնվող «Կարաս» հանրային սննդի օբյեկտի գործունեությունը։ Տեղեկությունը հայտնում է ՀՀ սննդամթերքի և անվտանգության տեսչական մարմինը։
Հաղորդագրության համաձայն` «Կարաս» հանրային սննդի օբյեկտում ստուգումների ընթացքում պարզվել է, որ խախտվել են սանիտարական կանոնների, հիգիենիկ նորմատիվների պահանջները:
«Առաստաղի վրա առկա են եղել վնասված տեղեր, ինչը նպաստել է կեղտի կուտակմանը, գոլորշու խտացմանը, անցանկալի բորբոսների աճին, խոհանոցի հատակի որոշ հատվածներ վնասված են եղել, արհեստական օդափոխության համակարգը եղել է ոչ բարվոք վիճակում, ինչը չի կանխել աղտոտված օդի ներթափանցումը տարածք»,- ասված է հաղորդագրությունում։
Երևանի Թումանյան 19 հասցեում գտնվող «Կարաս» հանրային սննդի օբյեկտը
© Photo : press office of the Food Safety Inspection Body of RA
Նշվում է նաև, որ դեպի դուրս բացվող պատուհաններից մեկը և հետնամուտքի դուռը չեն ունեցել միջատապաշտպան ցանց, հնարավոր է եղել աղտոտիչների ներթափանցումը, հետնամուտքի և խոհանոցի դռները հարթ չեն եղել, պատված չեն եղել չներծծող, մաքրվող աղտահանվող նյութերով։ Սննդի օբյեկտում առկա սառնարաններն էլ, որոնք անմիջական շփման մեջ են եղել սննդամթերքի հետ, չեն պահվել նորոգ վիճակում։
Երևանի Թումանյան 19 հասցեում գտնվող «Կարաս» հանրային սննդի օբյեկտը
© Photo : press office of the Food Safety Inspection Body of RA
Հայտնաբերված խախտումները վերացնելու համար սահմանվել է ժամկետ:
Հավելենք, որ «Կարաս» հանրային սննդի օբյեկտը պատկանում է «ԱՄՏՋ» ՍՊ ընկերությանը։