ԵՐԵՎԱՆ, 2 մարտի – Sputnik․ Դուբայի երկու օդանավակայաններն այսօր երեկոյան կվերսկսեն աշխատանքը։ Այս մասին հայտնել են Արաբական Միացյալ էմիրությունների իշխանությունները:
Ինչպես նշված է հաղորդագրության մեջ՝ այսօր ոչ մեծ թվով չվերթեր են իրականացվելու։
«Դուբայի օդանավակայանների ղեկավարությունը հայտնում է, որ այսօր երեկոյան սահմանափակ ձևաչափով կվերսկսվի իրենց աշխատանքը. թույլտվություն է տրվել միջազգային օդանավակայանից (DXB) և Ալ Մաքթումի օդանավակայանից (DWC) ոչ մեծ թվով չվերթերի համար»,- ասված է հաղորդագրության մեջ:
Ուղևորներին կոչ են արել տեղեկությունները ճշտել ավիաընկերություններից, ստանալ իրենց չվերթի վերաբերյալ հաստատում և միայն դրանից հետո ուղևորվել օդանավակայան։
Հիշեցնենք, որ ի պատասխան ամերիկա-իսրայելական հարձակման՝ Իրանը հարվածներ է հասցրել Պարսից ծոցի երկրներում տեղակայված օբյեկտների ուղղությամբ։ Վնասվել էին Դուբայի օդանավակայանը, որն օրական շուրջ 1000 չվերթ է սպասարկում, ինչպես նաև Աբու Դաբիի օդանավակայանը։ Չեղարկվել են հազարավոր չվերթեր, այդ թվում Դուբայից, Աբու Դաբիից և Շարժայից դեպի Հայաստան և հակառակ ուղղությամբ։
ԱՄՆ-ն և Իսրայելը փետրվարի 28-ի առավոտյան հարվածներ են հասցրել Իրանին։ Սպանվել են երկրի գերագույն հոգևոր առաջնորդ այաթոլլա Ալի Խամենեին, Իրանի զինված ուժերի գլխավոր շտաբի պետ Աբդուլռահիմ Մուսավին, պաշտպանության նախարար Ազիզ Նասիրզադեն, Իսլամական հեղափոխության պահապանների կորպուսի (ԻՀՊԿ) հրամանատար Մոհամմադ Պակպուրը և Պաշտպանության խորհրդի քարտուղար Ալի Շամխանին: Երկրում 40-օրյա սուգ է հայտարարվել: Իրանը պատասխան հրթիռային հարվածներ է հասցրել Իսրայելի տարածքին, ինչպես նաև Մերձավոր Արևելքում գտնվող ամերիկյան ռազմական օբյեկտներին: