ԵՐԵՎԱՆ, 27 փետրվարի - Sputnik. Գերմանիայի Բունդեսթագը (ԳԴՀ-ի խորհրդարանը – խմբ.) հավանություն է տվել միգրացիոն քաղաքականության ոլորտում փոփոխությունների փաթեթին, որը ենթադրում է ապաստանի տրամադրման ընթացակարգերի միաժամանակյա խստացում և աշխատանք փնտրողների համար աշխատանքային գործունեության հասանելիության դյուրացում: Այս մասին հայտնում է ՏԱՍՍ-ը։
Նախաձեռնությանն աջակցել են ՔԴՄ/ՔՍՄ դաշինքի և Գերմանիայի Սոցիալ-դեմոկրատական կուսակցության պատգամավորները: Դեմ են արտահայտվել «Այլընտրանք Գերմանիայի համար», «Կանաչներ» և «Ձախ» կուսակցությունների ներկայացուցիչները: Դրանով իսկ ՔԴՄ/ՔՍՄ և ԳՍԴԿ կառավարող կոալիցիան փաստացի ավարտել է ազգային օրենսդրության մեջ համաեվրոպական բարեփոխման դրույթների ներդրումը, որը ԵՄ մակարդակով հաստատվել էր 2024 թվականին։
Առանցքային նորամուծությունների թվում են բոլոր ժամանողների պարտադիր նույնականացումը և միջնորդությունների քննարկման արագացված ընթացակարգերի անցկացումը անմիջապես Եվրամիության արտաքին սահմաններին՝ հայտերի հավանության ցածր մակարդակ ունեցող երկրներից եկածների համար: Գերմանիայի դեպքում խոսքը առաջին հերթին միջազգային օդանավակայանների և նավահանգիստների մասին է։ Բացասական որոշման դեպքում դիմողները որոշակի պայմաններում կարող են արտաքսվել անմիջապես այդ կետերից:
Դրանից բացի, ընթացակարգերը կրճատվում են այն անձանց համար, ովքեր նախկինում ապաստան են խնդրել ԵՄ մեկ այլ երկրում: Միաժամանակ ավելանում է այն ժամկետը, որի ընթացքում հնարավոր է նրանց վերադարձը դիմումի քննարկման համար պատասխանատու պետություն։
Փոփոխությունների առանձին մի հատված վերաբերում է զբաղվածությանը։ Նախնական ընդունելության կենտրոններում ապրողները կկարողանան պաշտոնապես աշխատանքի տեղավորվել երկիր ժամանելուց երեք ամիս անց։ Ներկայում այս կատեգորիայի համար փաստացի գործում է աշխատանքի վեցամսյա սահմանափակում: Նրանք, ովքեր ապրում են նման կենտրոններից դուրս, արդեն երեք ամիս անց իրավունք ունեն մուտք գործել աշխատաշուկա: Զբաղվածության դաշնային գործակալությունն իրավունք ունի որոշ դեպքերում բացառություններ անել և թույլտվություններ տրամադրել ժամկետից շուտ:
Ընդդիմադիր ուժերը բարեփոխմանը տարբեր գնահատականներ են տվել։ «Այլընտրանք Գերմանիայի համար» կուսակցությունն առաջարկված միջոցները բավականաչափ կոշտ չի համարել։ Պատգամավոր Մաքսիմիլիան Կրան հայտարարել է. «Այն, ինչ դուք ներկայացնում եք այստեղ, հորինվածք է»:
«Կանաչների» ներկայացուցիչ Լուկաս Բենները, հակառակը, փոփոխությունները որակել է որպես «ապաստանի իրավունքի խոշորագույն խստացում 1993 թվականից ի վեր» և կասկածի տակ է դրել դրանց սահմանադրական հիմնավորվածությունը, հատկապես տեղաշարժի ազատության սահմանափակման մասով: «Ձախ» կուսակցության խմբակցությունում կարծում են, որ բարեփոխումը կհանգեցնի «ավելի մեծ քաոսի, տառապանքի և իրավազրկության»՝ ներքին գործերի նախարար Ալեքսանդր Դոբրինդտի խոստացած կարգուկանոնի փոխարեն:
Վիճակագրությունը ցույց է տալիս 2023 թվականի աշնանից ի վեր ապաստանի առաջնային դիմումների թվի նվազում։ Եթե 2024 թվականին Գերմանիայում գրանցվել է գրեթե 230 հազար նման դիմում, ապա 2025 թվականին դրանց թիվը կրճատվել է մինչև մոտ 113 հազար։ Փորձագետների կարծիքով՝ դինամիկայի վրա ազդել են ԵՄ ներքին սահմաններին վերահսկողության ուժեղացումը, ինչպես նաև Սիրիայում 2024 թվականի դեկտեմբերին տեղի ունեցած քաղաքական փոփոխությունները: