ԵՐԵՎԱՆ, 25 փետրվարի – Sputnik. Իրանի ԱԳՆ–ի պաշտոնական ներկայացուցիչ Իսմայիլ Բաղային կեղծ է որակել ԱՄՆ իշխանությունների հայտարարությունները իրանական հրթիռների և միջուկային ծրագրի, ինչպես նաև Իսլամական Հանրապետությունում տեղի ունեցած անկարգությունների զոհերի մասին։
«Իրանի միջուկային ծրագրի, իրանական բալիստիկ հրթիռների և հունվարյան անկարգությունների ժամանակ զոհերի թվի վերաբերյալ նրանց բոլոր հայտարարությունները պարզապես «մեծ ստի» կրկնություն են», – գրել է նա X սոցցանցում։
Ավելի վաղ ԱՄՆ նախագահ Դոնալդ Թրամփը հայտարարել էր, որ Իրանից դեռ խոստում չի ստացել, որ երբեք միջուկային զենք չեն մշակելու։ Թրամփը նաև հայտարարել է, որ Իրանն իբր արդեն մշակել է Եվրոպա հասնելու ունակ հրթիռներ և աշխատում է այնպիսիների վրա, որոնք կարող են ԱՄՆ հասնել։
Իրանում բողոքի ցույցերը սկսվել են 2025 թվականի դեկտեմբերի վերջին՝ ազգային արժույթի արժեզրկման պատճառով, սակայն ավելի ուշ վերածվել են անկարգությունների և իշխանությունների դեմ բողոքի ցույցերի։ Հայտնում էին, որ կան զոհեր ինչպես ուժայինների, այնպես էլ ցուցարարների շրջանում։ Իրանի իշխանությունները, որոնք մեղադրել էին ԱՄՆ-ին և Իսրայելին անկարգությունները կազմակերպելու մեջ, հունվարի 12-ին հայտարարեցին, որ կարողացել են իրավիճակը վերահսկողության տակ վերցնել։