ԵՐԵՎԱՆ, 24 փետրվարի – Sputnik. Արհեստական բանականության (ԱԲ) զարգացման պայմաններում ծրագրավորողները պետք է ոչ միայն ծրագրային կոդ գրել սովորեն, այլև բիզնես-գործընթացների վերաբերյալ գիտելիքներ ձեռք բերեն: Sputnik Արմենիայի հետ զրույցում այս տեսակետը հայտնեց Առաջատար տեխնոլոգիաների ձեռնարկությունների միություն (UATE) նախագահ, «Volo» ընկերության համահիմնադիր Արմեն Քոչարյանը։
Արմեն Քոչարյան
© Sputnik / Aram Nersesyan
Նրա խոսքով՝ սկսնակ ծրագրավորողները պետք է սովորեն, թե ինչ սկզբունքներով է կառուցվում ծրագրային կոդը և ինչպես են ծրագրային պրոդուկտները ներդրվում բիզնեսում:
Քոչարյանի կարծիքով` արդյունքում միևնույն խնդիրը լուծելու համար, ամենայն հավանականությամբ, ավելի քիչ ծրագրավորողներ պետք կգան, բայց նրանք, ովքեր կսովորեն ավելի արդյունավետ աշխատել ԱԲ-ով, կկարողանան նոր պրոդուկտներ ստեղծել։
Հետևաբար, ըստ նրա, սխալ է ասել, որ սկսնակ ծրագրավորողները պահանջարկ չունեն կամ կդադարեն պահանջված լինել: Պարզապես ընկերությունները փոխում են իրենց մասնագիտական զարգացման ծրագրերը։ Հայաստանը բացառություն չէ. ամբողջ աշխարհում ՏՏ ընկերությունները ճիշտ կողմնորոշվելու ուղիներ են փնտրում փոփոխվող միջավայրում։
«Հայերի մասին ասում են, որ կարողանում են արագ վերլուծել իրավիճակը և բարդ պայմաններում լուծումներ գտնել։ Հուսով եմ, որ մեր ընկերությունները դա կարող են անել։ Հապաղել չի կարելի, մենք քիչ ժամանակ ունենք», - ասաց Քոչարյանը։
UATE-ի նախագահը հավելեց՝ բիզնեսն էլ պետք է անհրաժեշտ ազդակներ ուղարկի կրթական համակարգին։
«Armenian Code Academy» կրթական կազմակերպության հետազոտության համաձայն՝ Հայաստանի ՏՏ ոլորտի աշխատակիցների թիվը 2025 թվականին հասել է 59 060-ի և այժմ կազմում է երկրում պաշտոնապես գրանցված բոլոր վարձու աշխատողների շուրջ 7%-ը։