ԵՐԵՎԱՆ, 23 փետրվարի - Sputnik. Կիևի կողմից «Դրուժբա» նավթամուղով նավթի տարանցման դադարեցման պատճառով Հունգարիան արգելափակել է հակառուսական պատժամիջոցների 20-րդ փաթեթը և Ուկրաինային ԵՄ-ի 90 միլիարդ եվրոյի վարկը: Այդ մասին հայտարարել է Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն՝ ամփոփելով ԵՄ երկրների ԱԳ նախարարների խորհրդի նիստի արդյունքները:
«Այսօրվա հանդիպման ժամանակ ես հայտարարեցի, որ չենք աջակցում պատժամիջոցների 20-րդ փաթեթին և դրա թույլտվությունը չենք տալիս։ Նաև հստակ ասացի, որ չենք համաձայնի Ուկրաինային 90 միլիարդ եվրոյի ռազմական վարկի տրամադրմանը։ Քանի որ ուկրաինացիները չեն կարող շանտաժի ենթարկել մեզ, չեն կարող վտանգել Հունգարիայի էներգամատակարարման անվտանգությունը՝ բանակցելով Բրյուսելի և հունգարական ընդդիմության հետ։ Հենց այդպես էլ ասացի՝ ո՛չ, հստակ ոչ», - ասել է Սիյարտոն տեղական «M1» հեռուստաալիքով։
Սիյարտոյի խոսքով`Հունգարիան Ուկրաինայի կողմից ռուսական նավթի տարանցման դադարեցումը «Դրուժբա» խողովակաշարով գնահատում է որպես ոտնձգություն իր ինքնիշխանության դեմ:
«Ներկայում ուկրաինացիները ոտնձգություն են կատարում մեր ինքնիշխանության դեմ, քանի որ երկրի էներգամատակարարմանը սպառնացող վտանգը (Ուկրաինայի կողմից «Դրուժբա» խողովակաշարով տարանցման դադարեցումը -խմբ.), անկասկած, կարող է դասակարգվել որպես ոտնձգություն ինքնիշխանության դեմ», - հայտարարել է նա:
Միաժամանակ, ինչպես գրում է «New York Times» թերթը, Եվրոպայի կողմից Կիևին ֆինանսական միջոցների հատկացումը կանգնեցվել է Ուկրաինայի համար կրիտիկական պահին։
«Կրիտիկական պահին Ուկրաինայի համար այս քայլը անորոշություն է ստեղծում։ Ուկրաինացի պաշտոնյաներն ասում են, որ բյուջեիպակասուրդից խուսափելու համար իրենց անհրաժեշտ է միջոցներ հատկացնել այս գարնանը», - ասվում է հրապարակման մեջ։
Ուկրաինան վերջին մի քանի տարիներին ընդունում է ռեկորդային պակասուրդով բյուջե՝ հույս ունենալով այն լրացնել արևմտյան օգնության հաշվին։ 2025 թվականի դեկտեմբերին «Guardian» թերթը նախազգուշացրել էր, որ եթե Ուկրաինան արտաքին ֆինանսավորում չստանա, ապա մինչև գարուն կսնանկանա։