ԵՐԵՎԱՆ, 22 փետրվարի – Sputnik. Իրանի արտաքին գործերի նախարար Աբբաս Արաղչին բանակցություններ է վարել ՄԱԳԱՏԷ-ի գլխավոր տնօրեն Ռաֆայել Գրոսիի հետ, որի ընթացքում նրանք քննարկել են Թեհրանի և Վաշինգտոնի միջև անուղղակի շփումները։ Այս մասին հաղորդվել է Իրանի արտաքին գործերի նախարարի Telegram ալիքում։
Կողմերն ընդգծել են բանակցային գործընթացն առաջ մղելու համար կառուցողական ներգրավվածության և երկխոսության կարևորությունը, ինչպես նաև քննարկվող հարցերի շուրջ կայուն և փոխադարձաբար ընդունելի փոխըմբռնման հասնելու անհրաժեշտությունը։
Հիշեցնենք, որ ԱՄՆ-ն և Իրանը վերսկսել են միջուկային բանակցությունները փետրվարի սկզբին՝ Օմանի միջնորդությամբ, որը առաջինն էր 2025 թվականի հունիսին Իսրայելի և Իրանի միջև 12-օրյա հակամարտությունից հետո։
Անուղղակի բանակցությունների երկրորդ փուլը տեղի է ունեցել փետրվարի 17-ին Ժնևում։ Հանդիպումից հետո Արաղչին հայտարարել է, որ կողմերը համաձայնության են եկել «հիմնական սկզբունքների» շուրջ։ Միևնույն ժամանակ, Սպիտակ տան մամուլի քարտուղար Քերոլայն Լևիթը նշել է, որ կողմերի միջև տարաձայնություններ են մնացել մի շարք հարցերի շուրջ։ ԱՄՆ նախագահ Դոնալդ Թրամփն, իր հերթին, հայտարարել է, որ բանակցությունները «լավ են ընթանում» և կոչ է արել Թեհրանին միանալ Միացյալ Նահանգներին «խաղաղության ճանապարհին»։