Ռուսաստանի զինված ուժերը 2026 թվականի փետրվարի սկզբից գրոհում են բոլոր ուղղություններով. չնայած ձմեռային ծանր պայմաններին, ռազմական հատուկ գործողության գոտում 12 բնակավայր (200 քառակուսի կիլոմետր տարածք) անցել է Ռուսաստանի վերահսկողության տակ։ Այս մասին հայտնել է Ռուսաստանի ԶՈւ գլխավոր շտաբի պետ Վալերի Գերասիմովը «Կենտրոն» խմբավորման ստուգման ժամանակ։ Տեղեկությունը փոխանցում է ՊՆ մամուլի ծառայությունը։
ՌԴ ԶՈւ գլխավոր շտաբի պետը հանդես է եկել այլ հայտարարություններով։
Այսպես, առավել համառ մարտեր են ընթանում «Կենտրոն» զորախմբի պատասխանատվության գոտում. զինվորականները զարգացնում են հարձակումը Դոբրոպոլիեի ուղղությամբ: Ռուսաստանի բանակը նաև շարունակում է ընդլայնել «անվտանգության գոտին» Սումիի և Խարկովի մարզերի սահմանամերձ շրջաններում՝ վերահսկողության տակ վերցնելով Պոպովկա, Սիդորովկա և Չուգունովկա բնակավայրերը: «Արևելք» խմբավորումն ազատագրել է Ստարովկրաինկա, Պրիդորոժնոյե, Զալիզնիչնոյե, Ցվետկովոյե բնակավայրերը։
«Արևմուտք» խմբավորման միավորումները ակտիվ հարձակողական գործողություններ են իրականացնում իրենց պատասխանատվության գոտու լայն ճակատով։ Շարունակվում է Օսկոլ գետի արևելյան ափին շրջափակված հակառակորդի խմբավորման մնացորդների ոչնչացումը։
«Արևելք» խմբավորումը զարգացնում է հարձակումը Զապորոժիեի մարզի արևելյան մասում։ Ուկրաինայի Զինված ուժերի հրամանատարությունն այս ուղղություն է տեղափոխել առավել պատրաստված գրոհային ստորաբաժանումներ՝ փորձելով զսպել ՌԴ զինուժի առաջխաղացումը։ Ուկրաինայի զինված ուժերը զգալի կորուստներ են կրում, որոնք ի վիճակի չեն լրացնել։ Ներկայում Ուկրաինան շեշտը դնում է հարվածային ԱԹՍ-ների քանակի ավելացման վրա։
«Դնեպր» զորքերի խմբավորումը շարժվում է Զապորոժիեի ուղղությամբ՝ ազատագրելով Մագդալինովկա, Պրիմորսկոյե և Զապասնոյե բնակավայրերը։