ԵՐԵՎԱՆ, 13 փետրվարի – Sputnik. ԱՄՆ ռազմածովային ուժերի «Gerald R. Ford» ավիակիրն ու նրան ուղեկցող նավերը կուղարկվեն Մերձավոր Արևելք։ Տեղեկությունը հայտնում է «New York Times»-ը՝ հղում անելով ԱՄՆ վարչակազմի աղբյուրներին:
Ըստ լրատվամիջոցի` Կարիբյան ծովում տեղակայված նավախմբի անձնակազմին այդ մասին տեղեկացրել են երեկ: Նավախումբը Պարսից ծոցում պետք է միանա «Abraham Lincoln» ավիակրի հարվածային խմբին:
ԶԼՄ–ն տեղեկացնում է, որ «Gerald R. Ford» ավիակիրը, որի ռազմական ինքնաթիռները հունվարին մասնակցել են Կարակասի դեմ հարձակմանը, պետք է տուն վերադառնար մարտին:
Սա կլինի ԱՄՆ երրորդ ավիակիրը, որը պարեկություն կանի Մերձավոր Արևելքի ջրերում:
Սրացում Վաշինգտոնի և Թեհրանի միջև
ԱՄՆ նախագահ Դոնալդ Թրամփը Թեհրանից պահանջում է գործարք կնքել, որը կբացառի Իրանում միջուկային զենքի առկայությունը: Նա զգուշացրել է, որ հակառակ դեպքում Իրանն ավելի հզոր հարձակման կենթարկվի, քան անցյալ ամռանը: Հունվարի վերջին ԱՄՆ–ն ռազմանավերի նավատորմ ուղարկեց Օմանի և Պարսից ծոցեր: Ավելի ուշ Պենտագոնի ղեկավար Փիթ Հեգսեթը, որ լրացուցիչ ուժեր են ուղարկվել այնտեղ։
Ինչպես գրում են ԶԼՄ–ները, Վաշինգտոնն ակնկալում է, որ Թեհրանը լիովին կհրաժարվի ուրանի հարստացումից և կսահմանափակի բալիստիկ հրթիռների արտադրությունը։
ԱՄՆ-ի և Իրանի պատվիրակությունները փետրվարի 6-ին Մասկատում (Օման) բանակցություններ անցկացրին Իրանի միջուկային ծրագրի շուրջ։ ԱՄՆ նախագահ Դոնալդ Թրամփը հայտարարեց, որ բանակցությունները լավ ընթացք են ունեցել և կշարունակվեն։ Փետրվարի 8-ին Իրանի արտգործնախարար Աբբաս Արաղչին ընդգծեց, որ Իրանը պնդում է ուրանը հարստացնելու իր իրավունքը, նույնիսկ եթե դա պատերազմի հանգեցնի։
Երեկ Թրամփը կրկին սպառնացել է` եթե գործարքը ձախողվի, Վաշինգտոնը կանցնի գործողությունների երկրորդ փուլի, որը «շատ ծանր» կլինի Թեհրանի համար: