Իրանն ուզում է համաձայնության գալ ԱՄՆ-ի հետ և պատրաստ է ուրանի ստուգումների. Թուրքիայի ԱԳՆ

ԵՐԵՎԱՆ, 12 փետրվարի – Sputnik. Թուրքիայի արտգործնախարար Հաքան Ֆիդանը կարծում է, որ Իրանն անկեղծորեն հետաքրքրված է ԱՄՆ-ի հետ համաձայնության գալու հարցում և պատրաստ է գնալ ուրանի հարստացման սահմանափակումներին և ստուգումների ուժեղացված ռեժիմին, հայտնում է Financial Times թերթը՝ հղում անելով նախարարի հայտարարություններին։

«Կարծում եմ` Թեհրանն անկեղծորեն ցանկանում է իրական համաձայնության հասնել», – մեջբերում է թերթը Ֆիդանի խոսքերը։

Թուրքիայի արտգործնախարարն ընդգծել է, որ մշտական շփումներ է պահպանում ամերիկացի, իրանցի և տարածաշրջանային պաշտոնական այրերի հետ։

Միևնույն ժամանակ, նախարարի խոսքով, եթե Վաշինգտոնը պնդի, որ բոլոր վիճահարույց հարցերը պետք է լուծվեն միաժամանակ, այդ թվում՝ Իրանի բալիստիկ հրթիռների ծրագիրը և տարածաշրջանում զինված խմբավորումների աջակցությունը, նույնիսկ միջուկային հարցը կարող է փակուղի մտնել։

«Վախենում եմ, որ այս դեպքում նույնիսկ միջուկային հարցն առաջ չի շարժվի... արդյունքը կարող է լինել ևս մեկ պատերազմը տարածաշրջանում», – ասել է Թուրքիայի արտգործնախարարը։

Ֆիդանը նաև հայտարարել է, որ Անկարան, տարածաշրջանային այլ երկրների հետ համատեղ, փորձում է մշակել «ստեղծագործական գաղափարներ»՝ Իրանի հրթիռային ծրագրի և զինված խմբավորումներին նրա աջակցության հետ կապված հարցերը լուծելու համար, և պատրաստ է «կառուցողական և արդյունավետ դեր» խաղալ այս գործընթացում։

Ավելի վաղ Թրամփը հայտարարել էր, որ «հսկայական նավատորմ» է շարժվում դեպի Իրան՝ հույս հայտնելով, որ Թեհրանը կհամաձայնի վերադառնալ բանակցությունների սեղանի շուրջ և կնքել, իր խոսքով, «արդար և իրավահավասար» գործարք, որը ենթադրում է միջուկային զենքից լիակատար հրաժարում:

ԱՄՆ առաջնորդը նաև հիշեցրել էր 2025 թվականի հունիսին Իրանի միջուկային օբյեկտներին «Կեսգիշերային մուրճ» (Midnight Hammer) գործողության շրջանակում իրականացրած հարվածները՝ հայտարարելով, որ «հաջորդ հարձակումը կլինի ավելի կոշտ» և կոչ արել «չհասցնել դրան»: