ԵՐԵՎԱՆ, 6 փետրվարի – Sputnik. Հայաստանի մերձեցումը Արևմուտքի հետ նոր մարտահրավերներ է ստեղծում Մոսկվա-Երևան հարաբերությունների համար։ Այս մասին հայտարարել է Երևանում ՌԴ դեսպան Սերգեյ Կոպիրկինը։
Դիվանագետը նշել է, որ Հայաստանն իր արտաքին քաղաքական կապերի առումով լայն դիվերսիֆիկացման քաղաքականություն է վարում, և այդ քաղաքականության նշանակալի տարրը Արևմտյան երկրների, ԵՄ-ի և ԱՄՆ-ի հետ մերձեցումն է։
«Մենք գիտենք, որ ԵՄ-ն այժմ թշնամական քաղաքականություն է վարում Ռուսաստանի Դաշնության նկատմամբ և, ընդհանուր առմամբ, բացահայտ ազդանշան տալով իր գործընկերներին, որ նրանք պետք է աջակցեն այդ քաղաքականությանը, այդ թվում՝ պատժամիջոցներին։ Իհարկե, սա նոր մարտահրավերներ է ստեղծում մեր հարաբերությունների համար և երկու կողմերից պահանջում է շատ ողջամիտ, հավասարակշռված և իմաստուն մոտեցում, ինչպես նաև ռազմավարական հեռատեսություն», – ասել է Կոպիրկինը «Ռոսիա 24» հեռուստաալիքի եթերում։
Նա հավելել է` այդ ամենը պահանջում է, որ երկու երկրների հարաբերությունները հարմարվեն նոր իրողություններին։
Դեսպանը նաև նշել է, որ Մոսկվան պատրաստ է քննարկելու «Թրամփի ուղի» նախագծին Ռուսաստանի միանալու հնարավորությունը` հատկապես հաշվի առնելով Ռուսաստանի և Հայաստանի փոխգործակցությունը երկաթուղային ոլորտի զարգացման գործում։
Կոպիրկինի խոսքով՝ Ռուսաստանն ուշադիր հետևում է, թե ինչ է տեղի ունենում «Թրամփի ուղի` հանուն միջազգային խաղաղության և բարգավաճման» նախագծի շուրջ։
Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը 2025 թվականի օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան:
Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։
ՀՀ վարչապետ Նիկոլ Փաշինյանը սեպտեմբերի 11-ին հայտարարեց, որ ՀՀ–ն ոչ թե 99 տարով հողը վարձակալության է տալիս ամերիկյան կողմին, այլ տալիս է կառուցապատման իրավունք։
2026 թվականի հունվարի 14-ին հրապարակվեց «Թրամփի ուղի՝ հանուն միջազգային խաղաղության և բարգավաճման» նախագծի (TRIPP) իրականացման շրջանակը։