ԵՐԵՎԱՆ, 27 հունվարի – Sputnik. Հանուն հայրենիքի զոհվածների հիշատակը և նրանց առաջ խոնարհվելը մեր պարտքն է, սա է պատճառը, որ հիշատակի պետական օր է սահմանվել։ Հանուն հայրենիքի զոհվածների հիշատակի և խոնարհման օրն այսպիսի ուղերձ է հղել ՀՀ վարչապետ Նիկոլ Փաշինյանը։
Նրա խոսքով` հայրենիքի համար զոհված յուրաքնչյուր զինվոր դարձել է յուրաքանչյուրի ընտանիքի անդամ։
«Բայց այս օրից այն կողմ մեր պատասխանատվությունը չի նվազում, այլ ընդհակառակը՝ ավելանում է պատասխանատվությունն այն բանի համար, որ մեր նահատակների զոհողություններն իզուր չլինեն։ Մեզ պատահած աղետներից հետո ամեն օր, ամեն Աստծո օր կառավարությունն ու խորհրդարանական մեծամասնությունը ջանք են դրել՝ գտնելու մի շատ կարևոր հարցի պատասխան` իսկ ի՞նչ պետք է անել, ինչպե՞ս անել, որ մեր նահատակների զոհողություններն ապրեցնող լինեն և ոչ թե կոտրող։ Այս հարցին տրվել է հստակ և աներկբա պատասխան` մեր նահատակներն ընկել են, որ Հայաստանի Հանրապետությունը բարձրանա»,– գրել է Փաշինյանը։
Նրա խոսքով` զոհվածների հիշատակը հավերժացնելու կարևոր նախապայմանն ուժեղ և անվտանգ ՀՀ ունենալն է։ Նիկոլ Փաշինյանը նշել է, որ նահատակների զոհողությունը «բացել է» իր աչքերը և այսօր նա գնում է խաղաղության ճանապարհով։
Հիշեցնենք` Հայաստանում այս տարվանից հունվարի 27–ը նշվում է որպես Հիշատակի և խոնարհումի օր։