ԵՐԵՎԱՆ, 26 հունվարի - Sputnik. «ՀայաՔվե» նախաձեռնությունն ահազանգում է` ընտրական օրենսգրքում փոփոխություններով՝ որպես դիտորդական առաքելություն իրենց գրանցումը փորձում են մերժել։
Նշենք, որ հունվարի 23-ին ՀՀ ԱԺ-ն երկրորդ ընթերցմամբ և ամբողջությամբ հրատապ ռեժիմով ընդունեց «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» նախագիծը։ Մինչ նախագծի ընդունումը ՔՊ-ական պատգամավոր Էդուարդ Աղաջանյանը հայտարարել էր` տվյալ նախագծով խափանվում է դիտորդական առաքելությունների անվան քողի ներքո քաղաքական միավորների մուտքն ընտրատեղամասեր, որտեղ վերջիններս ենթադրաբար ոչ թե ընտրական գործընթացների վերահսկողություն պետք է իրականացնեն, այլ քաղաքական ուղղորդումներ: Ըստ նախագծի՝ եթե պարզվի, որ դիտորդն աջակցում է որևէ կուսակցության, ապա ԿԸՀ-ն իրավունք ունի վարույթ հարուցել և ուժը կորցրած ճանաչել դիտորդական առաքելության հավատարմագրումը։
«ՀայաՔվեի» դիտորդական առաքելության ներկայացուցիչ Ատոմ Մխիթարյանը հրավիրված հրատապ ասուլիսի ժամանակ հայտարարեց, որ նոր փոփոխություններով չի հստակեցվում՝ ինչպես և ով է որոշելու՝ արդյոք տվյալ դիտորդական առաքելությունը ասոցացվում կամ նույնացվում է որևէ կուսակցության հետ, թե ոչ։
«Օրենքով այժմ նաև պահանջում են, որպեսզի դիտորդական առաքելությունը չիրականացնի «կողմ» կամ «դեմ» քարոզչություն։ Հստակեցված չէ՝ ինչ ժամանակահատվածի մասին է խոսքը։ Դիտորդական կազմակերպությունը նաև պետք է բացահայտի իր ֆինանսական աղբյուրները, ընդ որում, եթե առաքելության ընթացքում ինչ-որ փոփոխություն լինի, ու լրացուցիչ գումար գա, ԿԸՀ-ն անմիջապես պետք է իմանա։ Այսուհետև դիտորդական առաքելությունները պետք է իրենց վարքագծի կանոնները ներկայացնեն ԿԸՀ, վերջինն էլ հրապարակի այն իր կայքում»,- ասաց Մխիթարյանը։
Մխիթարյանը պարզաբանեց, որ նախկինում՝ որևէ կուսակցության քարոզչության արգելքին, այժմ ավելացել է նաև հակաքարոզչությունը։
«ՀայաՔվե» նախաձեռնության համակարգող Ավետիք Չալաբյանն էլ ընդգծեց, որ հանրության մեջ այս օրենքի նախագիծն անվանում են «ընդդեմ ՀայաՔվեի ու ժողովրդավարության նախագիծ»։ Շեշտեց՝ իրենց համար այդ զարգացումներն անակնկալ էին, առավել ևս, որ ԱԺ-ի նիստերի օրակարգում այդ նախագիծը հայտնվել է նախորդ օրվա երեկոյան։
«Քարոզչության և հակաքարոզչության այդ կոշտ արգելքը հակասում է ՀՀ սահմանադրության 79-րդ հոդվածի որոշակիության սկզբունքին։ Դրանով պահանջվում է, որ օրենքով սահմանված ցանկացած նորմատիվ վարքագիծ պետք է հստակ լինի։ Պարզ չէ նաև, թե ինչ նկատի ունեն ասելով հակաքարոզչություն»,- ասաց Չալաբյանը։
Նա նաև ընդգծեց, որ օրենքի հեղինակ ՔՊ-ական Արուսյակ Ջուլհակյանը նախագիծը ներկայացնելիս մի քանի անգամ «ՀայաՔվեի» անունն էլ հնչեցրել ու հայտնել է, թե հենց այս նախաձեռնության գործունեությունն է հիմք հանդիսացել նման փոփոխությունների համար։ Չալաբյանն այս փոփոխությունները հրեշավոր անվանեց։
Դիտորդական առաքելության համակարգող Արեգ Սավգուլյանն էլ շեշտեց՝ նոր օրինագիծը սահմանափակում է հասարակական դաշտում դիտորդական առաքելության գործունեությունը։ Սավգուլյանը վստահ է՝ այս օրինագծով «կոմֆորտ զոնա» է ստեղծվում «Քաղաքացիական պայմանագիր» կուսակցության արբանյակ դիտորդական առաքելությունների համար։
«Ենթադրում ենք, որ դրվում է ապագայում ընտրությունների կեղծման ֆունդամենտը հասարակական դաշտում։ Միևնույն ժամանակ նրբանկատորեն կամ կոպտորեն իրենք ուզում են մեկուսացնել «ՀայաՔվե» նախաձեռնությանը»,- ասաց առաքելության համակարգողը։
Նա շեշտեց, որ իրենք դիտորդական առաքելություն իրականացնելու ընթացքում խախտումներ արձանագրել են ոչ միայն իշխանական թևի, այլև ընդդիմադիր կուսակցությունների մոտ ու այդ ամենը ներառել են իրենց զեկույցում։