ԵՐԵՎԱՆ, 22 հունվարի – Sputnik. Հայաստանը Եվրասիական զարգացման բանկից դրամաշնորհ կստանա պետություն–մասնավոր գործընկերության ամրապնդման համար: Դրամաշնորհային համաձայնագրի ստորագրման առաջարկն այսօր հավանության արժանացավ ՀՀ կառավարության նիստի ժամանակ:
ՀՀ ֆինանսների նախարարությանը հատկացվող 250 հազար դոլար դրամաշնորհով կամրապնդվեն պետություն–մասնավոր գործընկերության նախագծերի կառավարման մեխանիզմները՝ միջազգային չափանիշներին համապատասխան:
Կիրականացվի, մասնավորապես, կառավարման համակարգի թույլ կողմերի վերլուծություն, ինչպես նաև կկազմվեն օրինակելի մոդելներ համատեղ նախագծերի համար:
Բացի այդ, պետական ապարատի այն աշխատակիցները, որոնք պատասխանատու են այդ նախագծերի համար, կվերապատրաստվեն APMG միջազգային ստանդարտով։