ԵՐԵՎԱՆ, 21 հունվարի – Sputnik. ՀՀ բիզնեսը դժգոհ է ոչ թե հակային դրույքաչափերից, այլ այն, որ հաճախակի փոփոխություններ են տեղի ունենում «Հարկային օրենսգրքում»։ Լրագրողների հետ հանդիպման ժամանակ այս հայտարարությունն արեց ՀՀ ֆինանսների նախարար Վահե Հովհաննիսյանը։
ՀՀ ֆինանսների նախարարությունը «Հարկային օրենսգրքում» փոփոխությունները նվազեցնելու և նոր մեխանիզմ կիրառելու համար որոշել է ներդնել Նոր Զելանդիայի փորձ, ըստ որի` հրապարակվում է մի փաստաթուղթ, որտեղ նշվում է, թե հաջորդ տարի հարկային ինչ փոփոխություններ են տեղի ունենալու։
«Ըստ այդմ` կարծում ենք, որ հարկային փոփոխությունները տեղի են ունենալու տարին մեկ անգամ»,– ընդգծեց նա։
Անդրադառնալով շրջհարկի վերաբերյալ հարցին, թե արդյոք ՀՀ կառավարությունը այն հանելո՞ւ է, քանի որ պարբերաբար նման հայտարարություններ հնչում էին վարչապետի և նախարարի կողմից, Հովհաննիսյանն ասաց, այս հարկատեսակի վերացման մասին այսօր չեն խոսում։
«Մենք կարծում ենք, որ այստեղ պարզեցնելու հստակեցնելու բաներ կան, որ ՓՄՁ–ի համար հարկային վարչարարության բեռը նվազեցնենք։ Ունենք գաղափարներ` ինչպես պետք է դա անենք։ Հիմնականում խոսքը վերաբերում է թվայնացման գործիքներին. այն մարդիկ, որոնք չգիտեն հաշվապահություն վարել, ստիպված չլինեն մեծ գումարներ ծախսել հաշվապահ պահելու, հետո էլ` ՊԵԿ–ի հետ խնդիրներ լուծելու համար»,– ընդգծեց նա։
Հովհաննիսյանն ավելացրեց, որ շրջհարկի հետ կապված այս մոտեցումները, ամենայն հավանականությամբ, տեղի չեն ունենա 2026 թվականի ընթացքում։
Նա նաև նշեց, որ հարկեր–ՀՆԱ հարաբերակցությունում, օրինակ, 2025 թվականի ամփոփ ցուցանիշի մեջ 2024 թվականի համեմատ կունենանք 1 տոկոսի բարելավում` հասնելով 24.5 տոկոսի, որը մոտ է կառավարության կողմից դրված 25 տոկոս թիրախային ցուցանիշին։
Բացի այդ, Հովհաննիսյանը տեղեկացրեց, որ 2025 թ. ունեցել ենք սպասվածից 1 տոկոսային կետով ավելի փոքր դեֆիցիտ, մինչդեռ 2025 թ. համար պլանավորել էին 5.5 տոկոս դեֆիցիտ։
Նախարարը ներկայացրեց նաև մի քանի տնտեսական ցուցանիշ, որոնք առավել աչքի են ընկել 2025 թվականի ընթացքում։ Մասնավորապես նա առանձնացրեց ՀՆԱ–ի աճի ցուցանիշը` նշելով, որ վերջին տարիներին տպավորիչ աճեր ենք ունեցել։
«Ուրախ ենք, որ այդ աճի միտումները շարունակում են մնալ բարձր։ Դրանով է նաև պայմանավորված միջազգային վարկանիշային գործակալության կողմից Հայաստանի վարկանիշի` կայունից դեպի դրական փոփոխությունը»,– հայտարարեց Հովհաննիսյանը։
Ի դեպ, նա տեղեկացրեց, որ ՀՀ պաշտպանության նախարարության գծով կապիտալ ծախսերը 2025 թվականին 86 մլրդ դրամով շատ եղել` կազմելով 419 մլրդ դրամ։