Մեր աշխատանքի գնահատականն է․ Սինանյանը՝ ստացած պարգևավճարի մասին

ԵՐԵՎԱՆ, 15 հունվարի – Sputnik. Սփյուռքի գլխավոր հանձնակատարի գրասենյակի ղեկավար Զարեհ Սինանյանն իր աշխատանքի գնահատականն է համարում ստացված պարգևավճարը։ Նա այդ մասին ասաց լրագրողների հետ զրույցում։

Լրագրողները հետաքրքրվեցին՝ ազնի՞վ է համարում այդ չափի պարգևավճարը (մոտ 6-7 մլն դրամ), Սինանյանը պատասխանեց՝ գնահատողն ինքը չի եղել, հետևաբար այդ հարցին չի կարող պատասխանել։

Ավելի վաղ հայտնի էր դարձել, որ ՀՀ վարչապետ Նիկոլ Փաշինյանը ստորագրել է մի փաստաթուղթ, որով խրախուսման ֆոնդից շուրջ 3 մլրդ դրամ է հատկացվել ՀՀ վերնախավին պարգևավճարներ տալու համար։ Այսպես՝ բաժնի պետերը ստացել են մոտ 1,5–2 միլիոն դրամ, վարչության պետերը՝ 2,5–3 միլիոն դրամ, փոխնախարարները՝ 3,5–4,5 միլիոն դրամ, իսկ նախարարները՝ մինչև 6–7 միլիոն դրամ։