ԵՐԵՎԱՆ, 15 հունվարի – Sputnik. Իրանի Իսլամական Հանրապետությունում զանգվածային բողոքի ցույցերի և անկարգությունների հետևանքով զոհվել է 2 հայ։ Սփյուռքի գլխավոր հանձնակատարի գրասենյակի ղեկավար Զարեհ Սինանյանը լրագրողների հետ զրույցում հայտնեց, որ խոսքը հաստատված դեպքերի մասին է։
«Մեկ զոհ կար հաստատված, երկրորդ զոհն էլ կարծես հաստատվել է։ Խոսվում է ավելի մեծ թվերի մասին, բայց հստակ որևէ տեղեկություն չունենք»,- ասաց Սինանյանը։
Ինչ վերաբերում է Իրանի հայ համայնքի հետ կապին, ապա Սինանյանը նշեց՝ անմիջական կապ չունեն։
«Միայն թռիչքներով ժամանող անձանց միջոցով ենք տեղեկություններ ստանում։ Մեր ՀՀ դեսպանության հետ էլ երեկվա դրությամբ կապ չունեինք»,- հավելեց նա։
Հիշեցնենք` Իրանում բողոքի զանգվածային ակցիաներ են անցկացվում 2025–ի դեկտեմբերի 28-ից։ Դժգոհության հիմնական պատճառները փոխարժեքի տատանումներն են ու գների բարձրացումը։ Սակայն ավելի ուշ Իրանի մի շարք քաղաքներում բողոքի ակցիաները վերաճեցին ոստիկանության հետ բախումների, իսկ կարգախոսները ստացան քաղաքական բնույթ՝ ընդդեմ Իրանում առկա քաղաքական կարգի:
Հունվարի 2-ին ԱՄՆ նախագահ Դոնալդ Թրամփը հայտարարեց, թե ԱՄՆ–ն պատրաստ է պաշտպանել Իրանի քաղաքացիներին, եթե այդ երկրի իշխանությունները ուժ կիրառեն նրանց դեմ: Թեհրանը դատապարտեց այդ սպառնալիքները։
Հունվարի 8-ին Իրանում տեղի ունեցան ամենամասշտաբային բողոքի ցույցերը, որոնք հրահրվել էին 1979 թվականին տապալված շահի որդու՝ Ռեզա Փահլավիի կոչով: Այնուհետև փողոց էին դուրս եկել գործող իշխանության կողմնակիցները։