ԵՐԵՎԱՆ, 14 հունվարի – Sputnik․ Իրանում այս օրերին տեղի ունեցան գազանություններ, որոնք գերազանցեցին «Իսլամական պետություն» խմբավորման ահաբեկիչների գործողությունները։ Այսօր հրավիրված ասուլիսի ժամանակ այդ մասին ասաց Հայաստանում Իրանի նորանշանակ դեսպան Խալիլ Շիրղոլամին։
«Գրանցվել է ոստիկանների գլխատման չորս դեպք, եղել են մի քանի դեպքեր, երբ ոստիկաններին ողջ-ողջ այրել են։ Կան տեսագրություններ, որտեղ լսվում են հստակ հրահանգներ, որ պետք է կրակել մարդկանց գլխին»,- ասաց նա։
Դեսպանը հավելեց՝ սպանվել են ոչ միայն ոստիկաններ, այլև քաղաքացիական բնակչություն, ինչպես նաև արտերկրում պատրաստություն անցած ահաբեկիչներ։
Նրա խոսքով՝ Իրանը պատրաստ է բանակցությունների, սակայն դրանք պետք է հիմնված լինեն փոխադարձ հարգանքի վրա և պետք է պահպանվեն հիմնարար և տարրական սկզբունքները։
Դեսպանը հաստատեց նաև, որ Իրանի արտգործնախարար Աբբաս Արաղչին վերջին երկու օրվա ընթացքում բանակցություններ է վարել ԱՄՆ նախագահի հատուկ բանագնաց Սթիվ Ուիտկոֆի հետ։ Շիրղոլամիի խոսքով՝ Պարսից ծոցի երկրներից մեկն էլ քայլեր է ձեռնարկել՝ երրորդ երկրի միջնորդությամբ բանակցություններ վարելու համար։
Հիշեցնենք` Իրանում բողոքի զանգվածային ակցիաներ են անցկացվում դեկտեմբերի 28-ից։ Դժգոհության հիմնական պատճառները փոխարժեքի տատանումներն են ու գների բարձրացումը։ Իրանի ԿԲ-ի տվյալներով՝ գնաճի տարեկան ցուցանիշը հասել է 38,9 տոկոսի, ազգային արժույթը կտրուկ արժեզրկվել է։ Մի շարք քաղաքներում բողոքի ակցիաները վերածվել են ոստիկանության հետ բախումների։