Ախուրիկ գյուղում տեղյակ չեն ՌԴ սահմանապահներին Թուրքիայի հետ սահմանից հեռացնելու մասին

ԵՐԵՎԱՆ, 13 հունվարի - Sputnik. Սահմանամերձ Ախուրիկ գյուղում տեղեկություններ չունեն ՌԴ սահմանապահներին թուրքական սահմանից դուրս բերելու ծրագրերի մասին։

Ավելի վաղ News.am–ը, վկայակոչելով դիվանագիտական աղբյուրին, գրել էր, թե Հայաստանի իշխանությունները շուտով մտադիր են ռուս սահմանապահներին դուրս բերել Շիրակի մարզի «Ախուրիկ» սահմանային անցակետից, և նույնիսկ նոր դրոշակաձող է տեղադրվել (ենթադրաբար` հայկական դրոշի համար– խմբ.):

Ախուրիկի վարչական ղեկավար Մարզպետ Սարգսյանը Sputnik Արմենիայի թղթակցի հետ զրույցում ասաց, որ ոչինչ չի լսել սահմանապահների հնարավոր դուրսբերման մասին, որևէ տեսանելի գործնական քայլ այդ ուղղությամբ չի եղել։

Տեղացիներն ասացին, որ նման լուրեր իրենք էլ են կարդացել, սակայն որևէ փոփոխություն չեն նկատել:

Նշենք, որ ի տարբերություն «Մարգարա» անցակետի, որը գտնվում է անմիջապես համանուն գյուղի հարևանությամբ, «Ախուրիկ» անցակետը բնակավայրից մոտ 2 կմ հեռավորության վրա է:

Նշենք, որ այժմ այնտեղ միայն նախկին երկաթուղային կայարանի և մաքսատան կիսաքանդ շենքերն են։ Sputnik Արմենիան 2023 - ին եղել է սահմանին։