ԵՐԵՎԱՆ, 12 հունվարի – Sputnik. Հայաստանի բանկերն ակնկալում են, որ 2026 թվականին քաղաքացիների և բիզնեսի կողմից կպահպանվի վարկերի նկատմամբ մեծ պահանջարկը։ Այս մասին են վկայում Կենտրոնական բանկի հերթական հարցման տվյալները, որոնց հղում է արվում 2025 թվականի 4-րդ եռամսյակի դրամավարկային քաղաքականության հաշվետվությունում։
2025թ. 4-րդ եռամսյակում բանկերը շարունակել են ավելացնել վարկավորման ծավալները։ Մասնավորապես` 2024թ. նոյեմբերի համեմատ 2025թ.–ին բանկերի վարկային պորտֆելն աճել է մոտ 24%-ով՝ բացարձակ թվերով կազմելով ավելի քան 7,6 տրիլիոն դրամ կամ 19,8 մլրդ դոլար։
2025 թվականի ընթացքում հիփոթեքային վարկերի աճը դանդաղել է, բայց այն դեռևս բարձր է։ Այսպես, 2024-ի վերջին այն կտրուկ՝ գրեթե մինչև 409% աճ է ունեցել, քանի որ շատ վարկառուներ շտապում էին արտոնյալ պայմաններով՝ եկամտային հարկի վերադարձով Երևանում գնել բնակարաններ։ 2025 թվականի հունվարի 1-ից վերցված հիփոթեքի համար այս արտոնությունը չի գործում։ Այս առումով մինչև 2025-ի տարեվերջ հիփոթեքային պորտֆելի աճը դանդաղել է, բայց, այնուամենայնիվ, նույն թվականի նոյեմբերին կազմել է +20%։
Այստեղից կարելի է ենթադրել, որ Երևանում և շրջակայքում անշարժ գույքի պահանջարկը շարունակում է բարձր մնալ, ընդ որում՝ տներն ու բնակարանները գնվում են ոչ միայն ապրելու համար, այլև որպես ապագայի ներդրում։
Կայուն է մնում նաև սպառողական վարկերի աճը (նոյեմբերի արդյունքներով՝ գրեթե +30%), ինչպես նաև բիզնես վարկերի գծով (միջինում, ըստ ոլորտների, մոտ +25%)։
Կենտրոնական բանկի հարցումները ցույց են տալիս, որ բանկերն ակնկալում են վարկավորման հետագա կայուն աճ՝ հաշվի առնելով տնտեսական նպաստավոր հեռանկարները, ինչպես նաև բանկերի միջև մրցակցության հաշվին վարկերի պայմանների մեղմացումը:
Վարկավորման բարձր ծավալների հետագա աճը կարող է նպաստել սպառման մակարդակի բարձրացմանը, ինչը կարող է մեծացնել գնաճը։ Բայց սա ընդամենը տեսական սցենարներից մեկն է: ԿԲ-ն չի բացառում նաև այլ հնարավորություն, երբ շուկայի գերհագեցվածության պատճառով անշարժ գույքի պահանջարկը միջնաժամկետ հեռանկարում կարող է նվազել: Դա կարող է շինարարության ոլորտում, հետևաբար` ամբողջ տնտեսության մեջ, թուլացնել ակտիվությունը և որպես հետևանք՝ իջեցնել գնաճը։