ԵՐԵՎԱՆ, 10 հունվարի – Sputnik. Իրանական բանակը կոչ է արել բնակչությանը զգոն լինել և կանխել թշնամական դավադրությունները, որոնք ուղղված են երկրում անկայունություն և անկարգություններ հրահրելուն:
Իրանի մի շարք քաղաքներում զանգվածային անկարգություններից հետո այսօր հրապարակված հայտարարության մեջ բանակը նախազգուշացրել է Իրանում իրավիճակը սասանելու ԱՄՆ-ի պլանների մասին՝ նպատակ ունենալով հաստատել իր գերիշխանությունը:
Հայտարարության մեջ նշվում է, որ բանակը, համագործակցելով այլ ուժային կառույցների հետ, ուշադրությամբ հետևում է տարածաշրջանում տեղի ունեցող իրադարձություններին՝ պաշտպանելով ազգային շահերը, ռազմավարական ենթակառուցվածքներն ու պետական սեփականությունը:
Հիշեցնենք` Իրանում բողոքի զանգվածային ակցիաներ են անցկացվում 2025–ի դեկտեմբերի 28-ից։ Դժգոհության հիմնական պատճառները փոխարժեքի տատանումներն են ու գների բարձրացումը։ Սակայն ավելի ուշ Իրանի մի շարք քաղաքներում բողոքի ակցիաները վերաճեցին ոստիկանության հետ բախումների, իսկ կարգախոսները ստացան քաղաքական բնույթ՝ ընդդեմ Իրանում առկա քաղաքական կարգի:
Հունվարի 2-ին ԱՄՆ նախագահ Դոնալդ Թրամփը հայտարարեց, թե ԱՄՆ–ն պատրաստ է պաշտպանել Իրանի քաղաքացիներին, եթե այդ երկրի իշխանությունները ուժ կիրառեն նրանց դեմ: Թեհրանը դատապարտեց այդ սպառնալիքները։