ԵՐԵՎԱՆ, 8 հունվարի – Sputnik. ՀՀ վարչապետ Նիկոլ Փաշինյանին սպասարկող ավտոմեքենայի համարանիշն այսուհետև լինելու է հայոց եռագույն, կողքին էլ` «1»։ Համապատասխան որոշումն ընդունվեց կառավարության այսօրվա նիստում։
Ճեպազրույցի ժամանակ Փաշինյանը, պատասխանելով լրագրողի հարցին, հիշեցրեց, որ մինչ այժմ համարանիշը եղել է «001 ՍՍ»։ Նրա տեղեկություններով՝ սա ՀՀ երրորդ նախագահ Սերժ Սարգսյանի անվան սկզբնատառերն են։
«Մենք կարծում ենք, որ պետական համարանիշը չպետք է որևէ մեկի անվանատառ կրի, չպետք է հիմա էլ լինի «ՆՓ»։ Պետական ընտրության հարց է, որն արվել է այն տրամաբանությամբ, որ արարողակարգային նրբությունները պահպանվեն։ Որքան էլ մենք ոչ ֆորմալ մոտեցումների կողմնակից լինենք, դա չի նշանակում պետական արարողակարգային տրամաբանությունները զրոյացնել»,- նշեց Փաշինյանը։
Նախագիծը մշակվել է ՀՀ ներքին գործերի նախարարության կողմից: