ԵՐԵՎԱՆ, 8 հունվարի – Sputnik. Հունվարի 9-ի կեսօրին նվազագույն մակարդակի մագնիսական փոթորիկներ են սպասվում։ Այս մասին հայտնել են Ռուսաստանի գիտությունների ակադեմիայի տիեզերական հետազոտությունների ինստիտուտի արեգակնային աստղագիտության լաբորատորիայից։
«Նվազագույն՝ G1 մակարդակի մագնիսական փոթորիկներ են սպասվում Երկիր մոլորակի կողքով միջին չափի պլազմային արտանետման պատճառով, որն Արևից պոկվել է հունվարի 6-ին»,-նշել են գիտնականները։
Նրանք հավելել են, որ հաշվի առնելով պլազմային ամպի ուժեղ կողմնային շեղումը՝ կանխատեսումը բավականին անկայուն է։
«Եթե արտանետումը նույնիսկ չնչին չափով շեղվի դեպի ձախ, ապա Երկրի կողքով կանցնի առանց որևէ գեոմագնիսական հետևանքի, մինչդեռ հակառակ ուղղությամբ «սխալի» դեպքում հնարավոր է գեոմագնիսական տատանումների զգալի ուժգնացում՝ հաշվարկային տվյալների համեմատ»,- նշել են գիտնականները։
Արեգակի վրա բռնկումների մակարդակն ու քանակը տարեսկզբից ցածր է, առաջիկա օրերին ուժգնացման նշաններ չկան։ Մոտակա երկու օրվա ընթացքում հնարավոր է արեգակնային քամու արագության չափավոր աճ Արևի՝ դեպի Երկիր ուղղված կողմում բավականին անսովոր ձևի հերթական պսակային անցքի հայտնվելու պատճառով։