ԵՐԵՎԱՆ, 6 հունվարի - Sputnik. ՄԱԿ-ի գլխավոր քարտուղար Անտոնիո Գուտերեշի ներկայացուցիչ Ստեֆան Դյուժարիկը հրաժարվել է մեկնաբանել ԱՄՆ ազգային անվտանգության նոր ռազմավարությունը և 21-րդ դարում «Մոնրոյի դոկտրինի» վերածնունդը։
«Մենք մտադիր չենք Միացյալ Նահանգների ազգային անվտանգության ռազմավարության մանրակրկիտ վերլուծություն անել․․․ Յուրաքանչյուր երկիր իրավունք ունի սեփական ազգային անվտանգության քաղաքականությունն ու նպատակները սահմանել։ Մենք միայն խնդրում ենք, որ դա արվի միջազգային իրավունքին լիովին համապատասխան»,-հայտարարել է նա՝ պատասխանելով դոկտրինի վերաբերյալ ԱՄՆ հայտարարությունների մասին հարցին։
Ավելի վաղ ԱՄՆ նախագահ Դոնալդ Թրամփը հայտարարել էր, թե Մոնրոյի դոկտրինն այժմ իր պատվին անվանում են «Դոնրոյի», քանի որ իր վարչակազմն իբր գերազանցել է անցյալի արտաքին քաղաքական հայեցակարգի նպատակները։
Վենեսուելայի դեմ ԱՄՆ գործողությունների ֆոնին Թրամփը կոչ էր արել չմոռանալ դոկտրինի մասին, որն ամերիկյան մայրցամաքը հռչակում է այլ տերությունների միջամտության համար փակ գոտի, ինչպես նաև չկասկածել Արևմտյան կիսագնդում ԱՄՆ առաջնորդությանը։
Մոնրոյի դոկտրինը ԱՄՆ արտաքին քաղաքական ծրագիր է, որը նախագահ Ջեյմս Մոնրոն հռչակել է 1823 թվականի դեկտեմբերին՝ Կոնգրեսին ուղղված ամենամյա ուղերձում։ Դրանով նա եվրոպական տերություններին կոչ էր անում ձեռնպահ մնալ հետագա գաղութացումից կամ Արևմտյան կիսագնդի երկրների գործերին քաղաքական միջամտությունից։ Ժամանակի ընթացքում «Մոնրոյի դոկտրին» արտահայտությունը սկսեց նշանակել Արևմտյան կիսագնդում ԱՄՆ աշխարհաքաղաքական գերիշխանության քաղաքականություն։