ԵՐԵՎԱՆ, 30 դեկտեմբերի – Sputnik. Ուկրաինայի զինված ուժերի անօդաչու թռչող սարքերի հարվածների հետևանքով ՌԴ Բելգորոդի մարզում մեկ խաղաղ բնակիչ է մահացել, չորսը`վիրավորվել։ Տեղեկությունը հայտնել է մարզպետ Վյաչեսլավ Գլադկովը:
«Ուկրաինայի զինված ուժերի հերթական հարձակումների հետևանքով զոհվել է մեկ խաղաղ բնակիչ, չորսը վիրավորվել են։ Վոլոկոնովկայի շրջանի Գրուշևկա-Պյատնիցկոյե ավտոճանապարհի հատվածում մեքենային FPV-դրոնով հասցված հարվածի հետևանքով կին է մահացել, մեքենայում գտնվող տղամարդը ստացել է տարբեր աստիճանի բազմաթիվ վնասվածքներ, «Օռլան» ստորաբաժանման մարտիկները նրան տեղափոխել են Վոլոկոնովկայի հիվանդանոց», տելեգրամյան ալիքում գրել է Գլադկովը։
Նրա խոսքով՝ Բեսսոնովկա գյուղում ավտոմեքենայի վրա հարձակման հետևանքով բեկորային վնասվածքներ է ստացել մի տղամարդ, որին տեղափոխել են շրջանային հիվանդանոց, իսկ հետագա բուժման համար նախատեսում են տեղափոխել Բելգորոդի թիվ 2 քաղաքային հիվանդանոց։ Շեբեկինոյի շրջանի Վոզնեսենովկա գյուղում ևս դրոնը հարձակվել է մեքենայի վրա։ Գլադկովի փոխանցմամբ՝ վիրավոր վարորդին տեղափոխել են տեղի հիվանդանոց:
«Բելյանկա գյուղում տրակտորի վրա FPV-դրոնի հարձակման հետևանքով վնասվածքներ է ստացել մեկ այլ բնակիչ։ Շտապօգնության բրիգադը նրան տեղափոխել է մարզային կլինիկական հիվանդանոց։ Վնասվել է տեխնիկան»,– հավելել է մարզպետը։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Մարտական գործողություններն ընթանում են մինչ օրս։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։