ԵՐԵՎԱՆ, 25 դեկտեմբերի –Sputnik. ՀՀ վարչապետ Նիկոլ Փաշինյանը հաստատեց՝ պետական ապարատը բարձր պարգևավճարներ է ստացել։ Նա այսօր լրագրողների հետ զրույցում նշեց, որ ներդրվել է պիլոտային համակարգ, որով կառույցի ղեկավարներն են որոշում աշխատողի արդյունավետությունը։
«Հրաժարվում ենք համակարգից, երբ բոլորը ստանում են համատարած նույն դրույքաչափերը. սա կառավարելիությունը և մոտիվացիան նվազեցնում է։ Քանի որ արդար չէ, որ նույնչափ հավելավճար ստանան ավելի շատ ու քիչ ջանք գործադրածները։ Այո՛, հասել ենք այն կետին, որ վարձատրությունները լինեն մրցունակ մասնավոր հատվածի հետ»,– ասաց նա։
Փաշինյանի խոսքով՝ լրացուցիչ վարձատրություն ստացողն այդ գումարի 10 տոկոսը պետք է ծախսի կրթության և ինքնազարգացման վրա։
Վարչապետի գնահատմամբ՝ Հայաստանը հասել է այն կետին, որ պետական համակարգի ամբողջ բուրգում ներդրվի այս համակարգը։