ԵՐԵՎԱՆ, 25 դեկտեմբերի - Sputnik. Հայաստանի ֆուտզալի ազգային թիմը 100 տոկոսանոց ցուցանիշով նվաճեց Երևանում անցկացված «Unibank Cup» միջազգային մրցաշարի հաղթողի տիտղոսը։ Տեղեկությունը հայտնում է Հայաստանի ֆուտբոլի ֆեդերացիան։
Դեկտեմբերի 24-ին՝ մրցաշարային վերջին օրը, Ռուբեն Նազարեթյանի թիմն ուժերը չափեց Վրաստանի հավաքականի հետ ու հաղթեց 3։1 հաշվով։ Գոլերի հեղինակ դարձան Արսեն Պետրոսովն ու Նիկիտա Խրոմիխը, գրանցվեց նաև մեկ ինքնագոլ մրցակցի կողմից։
Մինչ այդ մեր ընտրանին պարտության էր մատնել Մոլդովայի (2:1) և Ղրղզստանի (5:1) թիմերին՝ ընդհանուր առմամբ վաստակելով 9 միավոր։
Հայաստանի ֆուտզալի ազգային հավաքականը հաղթեց միջազգային մրցաշարում
© Photo : Football Federation of Armenia
Այս մրցաշարը Հայաստանի նախապատրաստությունն է Եվրոպայի առաջնության եզրափակիչ փուլին, որը տեղի կունենա հունվարի 21-ից փետրվարի 7-ը Լատվիայում, Լիտվայում և Սլովենիայում։
Հիշեցնենք, որ Հայաստանի հավաքականը իր պատմության մեջ առաջին անգամ հասել է խոշոր միջազգային մրցաշարի եզրափակիչ։ Որակավորման փուլում Հայաստանը խմբում զբաղեցրեց առաջին տեղը՝ հաղթելով 5 խաղում և ոչ-ոքի խաղալով 1 խաղում։