ԵՐԵՎԱՆ, 23 դեկտեմբերի – Sputnik. Թուրքիայում տարեկան գնաճը, կանխատեսման համաձայն, մոտ 31% կկազմի, ինչը կգերազանցի կառավարության և Կենտրոնական բանկի կանխատեսումները։ Այս մասին հայտնում է թուրքական Dünya թերթը։
Ավելի վաղ Թուրքիայի փոխնախագահ Ջևդեթ Յըլմազը հայտարարել էր, որ իշխանությունները 2026 թվականին տնտեսական աճը կանխատեսում են 3.9%–ի մակարդակում, գնաճը՝ 20%-ից ցածր։
Թերթը նշում է, որ չնայած գնաճի իջեցման զգալի առաջընթացին՝ միջնաժամկետ ծրագրի սկզբնական նպատակային ցուցանիշները չեն իրականացվել։ Կենտրոնական բանկի վերջին կանխատեսումը, որը նախատեսում էր 25-29% միջակայք, նույնպես գերազանցվել է։
«Այս տարվա սեպտեմբերին պատրաստած 2026-2028 թվականների միջնաժամկետ ծրագրի թարմացված տարբերակում 2025 թվականի համար տարեկան գնաճի ցուցանիշը գնահատվել է 28.5%: Սակայն սպառողական գների տարեկան ցուցիչի վերաբերյալ ընդհանուր սպասումները, որը պաշտոնապես կհրապարակվի հունվարի 5-ին, ցույց է տալիս մոտ 31% մակարդակ», – նշվում է հրապարակման մեջ։
Վիճակագրական ինստիտուտի (TUIK) վերջին տվյալների համաձայն՝ Թուրքիայում տարեկան գնաճը նոյեմբերի արդյունքներով դանդաղել է մինչև 31.07% (նախորդ ամսվա 32.87%-ի համեմատ):
Միևնույն ժամանակ, ENAG անկախ հետազոտական խումբը սպառողական գների տարեկան ցուցիչի նոյեմբերի աճը գնահատել է 2.13%, իսկ տարեկան ցուցանիշը՝ 56.82%: