ԵՐԵՎԱՆ, 22 դեկտեմբերի – Sputnik. Մոսկվան մի շարք լուրջ հարցեր ունի ԱՄՆ-ին, մասնավորապես՝ ուկրաինական ճգնաժամի համատեքստում։ Այս մասին հայտարարել է ՌԴ փոխարտգործնախարար Սերգեյ Ռյաբկովը` ելույթ ունենալով «Վալդայ» բանավիճային ակումբում։
«Սկզբունքորեն կարևոր է, որ ամերիկյան կողմը բարձր մակարդակով համաձայնեց` հակամարտության հիմնական պատճառներից մեկը ՆԱՏՕ-ի համառ ընդլայնումն է դեպի Ռուսաստանի սահմաններ։ ԱՄՆ–ի` վերջերս հրապարակված ազգային անվտանգության ռազմավարության մեջ ուղղակիորեն դրված է Հյուսիսատլանտյան դաշինքի անվերջ ընդլայնման աննպատակահարմարության հարցը։ Դա ամենևին չի նշանակում, որ մենք այլևս հարցեր չունենք ամերիկյան կողմին, այդ թվում՝ ուկրաինական համատեքստում», - ասել է Ռյաբկովը։
Նրա խոսքով՝ Ռուսաստանի և ԱՄՆ-ի միջև ընթացող երկխոսության հաջողությունը կանխորոշված չէ։
«Այժմ ընթացող ռուս-ամերիկյան երկխոսության հաջողությունը կանխորոշված չէ։ Հաշվի առնելով այն ավերակները, որոնցում Բայդենի վարչակազմը թողել է մեր հարաբերությունները, դրանց կարգավորումը կպահանջի զգալի ժամանակ, կողմերի իրական շահագրգռվածություն և հսկայական աշխատանք», - ասել է նա։
Հիշեցնենք` ԱՄՆ վարչակազմն ուկրաինական կարգավորման պլան է մշակել։ Կրեմլը հայտարարել է, որ Ռուսաստանը բաց է բանակցությունների համար։
ՌԴ նախագահ Վլադիմիր Պուտինը դեկտեմբերի 2-ին Կրեմլում ընդունել է ԱՄՆ նախագահի հատուկ բանագնաց Սթիվ Ուիտկոֆին և Դոնալդ Թրամփի փեսա Ջարեդ Քուշներին: ԱՄՆ ներկայացուցիչների այցը Ռուսաստան կապված էր Ուկրաինայի հարցով ամերիկյան խաղաղ ծրագրի քննարկման գործընթացի հետ։ Ինչպես հայտնել էր Պուտինը, ամերիկյան կողմը 27 կետերը բաժանել է 4 փաթեթի և առաջարկել է դրանք առանձին քննարկել: