ԵՐԵՎԱՆ, 21 դեկտեմբերի – Sputnik. Ռուսաստանի նախագահ Վլադիմիր Պուտինը անպայման առանձին, ոչ պաշտոնական հանդիպումներ կունենա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ՝ այս օրերին Սանկտ Պետերբուրգում կայանալիք ԱՊՀ երկրների ղեկավարների ավանդական հանդիպման շրջանակներում։ Այս մասին հայտնել է Ռուսաստանի ղեկավարի մամուլի քարտուղար Դմիտրի Պեսկովը։
«Այս երկու օրերի ընթացքում Պուտինն անպայման կհանդիպի բոլորի հետ անհատապես։ Նման ոչ պաշտոնական շփման օրերը միշտ ուղեկցվում են առանձին ոչ պաշտոնական երկկողմ շփումներով։ Ահա թե ինչ արժեք ունի այս ձևաչափը», - լրագրողներին ասել է Պեսկովը՝ պատասխանելով այն հարցին, թե արդյոք նա առանձին հանդիպումներ կունենա Ալիևի և Փաշինյանի հետ Սանկտ Պետերբուրգում։
Դեկտեմբերի 21-ին Սանկտ Պետերբուրգում կկայանա Եվրասիական տնտեսական բարձրագույն խորհրդի նիստը, որին կհաջորդի ԱՊՀ ոչ պաշտոնական գագաթնաժողովը դեկտեմբերի 22-ին: Այս միջոցառումները Նոր տարվա նախօրեին անցկացնելը դարձել է ավանդույթ։
Եվրասիական տնտեսական միությունը միջազգային տնտեսական միավորում է, որը գործում է 2015 թվականի հունվարի 1-ից: Անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը: