ԵՐԵՎԱՆ, 19 դեկտեմբերի - Sputnik. Ռուսաստանցի էրգոթերապևտ Ելիզավետա Պանովան և ֆիզիոթերապևտ Յուլիա Մարյանսկայան, որոնք «Բարու առաքելություն» միջազգային կամավորական ծրագրի հյուրերն են, դեկտեմբերի 15-19-ն աշխատել են Երևանի թիվ 17 հատուկ դպրոցում, որտեղ սովորում են հենաշարժողական համակարգի խանգարումներ ունեցող երեխաներ: «Դժվար» դպրոցում աշխատելու մասին մասնագետները պատմել են Sputnik Արմենիա միջազգային մուլտիմեդիոն կենտրոնում կայացած մամուլի ասուլիսի ժամանակ։
Նրանց խոսքով՝ այսպես կոչված «խնդրահարույց երեխաների» հետ աշխատելու համար պատրաստի մեթոդներ չկան. շատ բան մտածվում է հենց տեղում։
Էրգոթերապևտ Ելիզավետա Պանովան ասում է՝ դասարանի յուրաքանչյուր երեխայի համար անհրաժեշտ են անհատական լուծումներ. ինչ-որ մեկի համար պետք է ոտքի հենարան պատրաստել, մյուսի գդալը ճկել՝ այն ավելի հարմար դարձնելու համար: Պետք է ուշադրություն դարձնել յուրաքանչյուր երեխայի կեցվածքին, վարքին, որպեսզի նա, առանց գերլարվելու, կարողանա ազատ բռնել գրիչը, պլաստիլինի հետ աշխատել, կատարել ֆիզիկական վարժություններ:
Էրգոթերապևտ Ելիզավետա Պանովան
© Sputnik
«Օրինակ՝ դասամիջոցին մենք ոչ միայն փորձում էինք երեխաներին ոտնացուպերով շարք կանգնեցնել, այլև գնդակը նրանց նետել այնպես, որ կարողանան խաղալ», - ասում է Պանովան:
Մասնագետները եկել էին ոչ թե դասավանդման, այլ հայ մանկավարժների ու մասնագետների հետ փորձի փոխանակման, որոնք ևս իրենց երկարամյա աշխատանքից շատ բան ունեն պատմելու: Ֆիզիոթերապևտ Յուլիա Մարյանսկայան ասում է, որ հայ գործընկերներին 5 օրերի ընթացքում «տանջել են», հետագա շփման համար կոնտակտներ խնդրել։
«Անընդհատ շփվել ենք նաև երեխաների ծնողների հետ՝ սկզբից մինչև վերջ։ Նրանք մեր բնական գործընկերներն են, քանի որ դասերից դուրս ամբողջ ժամանակն իրենց երեխաներին թերապևտն են», - նշում է մասնագետը:
Ֆիզիոթերապևտ Յուլիա Մարյանսկայանը
© Sputnik
Բարեբախտաբար, այժմ համացանցում կան բազմաթիվ կրթական կայքեր՝ ինչպես ուսուցիչներին, այնպես էլ ծնողներին օգնելու համար: Բայց մասնագետն ընդգծում է՝ փորձի կենդանի փոխանակումն անփոխարինելի է։
Երևանի թիվ 17 հատուկ դպրոցը հենաշարժական համակարգի խանգարումներ ունեցող երեխաների համար Հայաստանում միակ կրթական կազմակերպությունն է: Այն հիմնադրվել է 1972 թվականին, դարձել է առաջին նման դպրոցը ողջ Կովկասում։
«Բարու առաքելություն» միջազգային ծրագիրն իրականացվում է Ռուսաստանի «Ռոսսոտրուդնիչեստվո» դաշնային գործակալության կողմից՝ «Добро.РФ». ասոցիացիայի հետ համատեղ։ Ծրագրի իրականացման ընթացքում իրականացվել է 52 առաքելություն աշխարհի 17 երկրներում։