ԵՐԵՎԱՆ, 18 դեկտեմբերի – Sputnik. ՀՀ կառավարությունը ձեռք կբերի 12–րդ դարի արտեֆակտ՝ դռան փայտե փեղկ՝ հայկական միջնադարյան նկարներով։ Գնման համար ՀՀ պետական բյուջեից կհատկացվի 175,4 մլն դրամ։ Համապատասխան որոշումն ընդունվեց ՀՀ կառավարության այսօրվա նիստի ժամանակ։
Դռան փեղկը, որը գտնվում է Լոնդոնում` Սեմ Ֆոգի մասնավոր հավաքածում, սակայն թե ինչ կառույցում է այն ի սկզբանե գտնվել, չի նշվում:
Դռան փեղկը բաժանված է 4 մասի, որոնցից յուրաքանչյուրի վրա պատկերված է գեղարվեստական սյուժե։ Մեկի վրա խաչ է, որի տակ կանգնած է գազանների դեմ պայքարող հերոսը, որի մեջքին նույնպես պատկերված են խաչեր: Երկրորդ մասի վրա պատկերված է եկեղեցու գմբեթի տակ գտնվող խաչը` զարդարված ծաղկային զարդանախշերով։ Խաչի տակ պատկերված են թռչուններ, իսկ գմբեթի աջ կողմում` վեցաթև աստղ։ Դռան երրորդ և չորրորդ մասերը պատկերում են որսի տեսարաններ։
Մինչև 1990–ական թվականները հայտնի էին հայկական միջնադարյան փորագրության ընդամենը 8 պահպանված հուշարձաններ։
Նշենք, որ վերջին մի քանի տարվա ընթացքում ՀՀ կառավարությունը արտերկրի թանգարաններից և աճուրդներից գնում է միջնադարյան մշակույթի հուշարձաններ՝ տեղադրելով հայաստանյան պետական թանգարաններում: