ԵՐԵՎԱՆ, 17 դեկտեմբերի – Sputnik. Ակտիվիստ Արթուր Չախոյանը Երևանի քաղաքապետ Տիգրան Ավինյանն մեղադրում է հող գողանալու մեջ։ Այսօր ՀՀ գլխավոր դատախազության դիմաց լրագրողների հետ զրույցում նա ասաց, որ հաղորդում է ներկայացրել Ավինյանի դեմ։ Չախոյանը նշեց, որ խոսքը Նոր Նորք վարչական շրջանի Բաղյան փողոցի 2/5 հասցեում իրականացված ապօրինի շինարարության մասին է։
«Գյուղմթերքի շուկա է։ Երբ 2024 թվականին դեռ նոր էին սկսվել շինարարական աշխատանքները, ես գրավոր դիմումով քաղաքապետարան եմ դիմել ու հարցրել եմ՝ շինթույլտվություն ունե՞ն, թե՞ ոչ։ Երևանի քաղաքապետարանից պաշտոնական գրությամբ ինձ հայտնել են, որ տվյալ աշխատանքները կատարելու համար կա շինարարական թույլտվություն։ Մեկ տարի անց, երբ շուկան արդեն կառուցվել է, Երևանի քաղաքապետարանը հայտնում է, որ շինարարական աշխատանքներն իրականացվել են առանց թույլտվության։ Այսինքն՝ Երևանի քաղաքապետարանը պաշտոնական գրությամբ սուտ տեղեկություն է տրամադրել, որ ես հաղորդում չներկայացնեմ ու շինարարությունը չդադարի»,– ասաց նա։
Չախոյանը մեջբերեց Տիգրան Ավինյանի խոսքը, թե քաղաքապետարանը 7 անգամ մերժել է Նոր Նորքում ինքնակամ շինության օրինականացման հայտը։ Մեջբերեց նաև քաղաքապետի այն հայտարարությունը, որ երբ համայնքային հողի վրա կառուցված ապօրինի շենք-շինության համար դիմում են օրինականացման, և քաղաքապետարանը մերժում է, զուգահեռ ընդունվում է նաև քանդման որոշում։
«Ըստ Ավինյանի՝ 7 անգամ դիմել են, ու իրենք մերժել են, բայց մինչ օրս քանդման որոշում չի կայացվել»,– նշեց Արթուր Չախոյանը։
Ավելի վաղ Արթուր Չախոյանը ֆեյսբուքյան գրառմամբ հայտնել էր, որ հաղորդումը վերաբերում է ՀՀ քրեական օրենսգրքի 441-րդ , 445-րդ , 447-րդ և 448-րդ հոդվածներով նախատեսված արարքները կատարելուն։