ԵՐԵՎԱՆ, 16 դեկտեմբերի – Sputnik. Երևանի Մոսկվայի տանը պարգևատրվել են ռուսաց լեզվի ավելի քան 250 ուսուցիչներ Հայաստանի տարբեր մարզերից, որոնք որակավորման բարձրացման դասընթացներ են անցել «Ռուսաց լեզուն որպես օտար լեզու դասավանդելու հետ կապված ժամանակակից առարկայական-լեզվական ինտեգրատիվ տեխնոլոգիաներ» ծրագրով:
Ծրագիրն իրականացվել է ՌԴ Արմավիրի պետական մանկավարժական համալսարանի հետ համատեղ:
Պարգևատրման արարողության ժամանակ ՌԴ լուսավորության փոխնախարար Անդրեյ Կորնեևը կարևորել է ռուսաց լեզվի ուսուցիչների հատուկ դերը մշակութային և հոգևոր արժեքների պահպանման ու փոխանցման գործում, նրանց աշխատանքի շնորհիվ Հայաստանի դպրոցականները հաղորդակցվում են հարուստ մշակութային ժառանգությանը, հասկանում բարոյականության հիմքերը և հարգանք ու փոխըմբռնում սովորում։
Հայաստանում ՌԴ դեսպանության խորհրդական Միխայիլ Վոժդաևը նշել է Հայաստանում ռուսական կրթական ծրագրերի կայուն զարգացումն ու պահանջված լինելը:
Մրցանակների են արժանացել նաև «Ռուսաց լեզուն մշակույթների երկխոսության համար» միջազգային օլիմպիադայի եզրափակիչ փուլի մասնակիցները, ինչպես նաև նրանց թիմի ղեկավարները: