ԵՐԵՎԱՆ, 9 դեկտեմբերի – Sputnik. Ադրբեջանցիները վանդալիզմի են ենթարկել Արցախի Մարտակերտ շրջանի Երից Մանկանց վանքը։ Այս մասին ֆեյսբուքյան գրառում է կատարվել «Artsakh Monuments» էջում։ Վանքը 17–րդ դարի շինություն է։
«Վանքից անհետացել են բեմի վրա դրված եկեղեցու մանրակերտները, Սուրբ սեղանին հենած խաչքարը։ Ջարդել են գեղաքանդակ խաչքարի ստորին հատվածը, որն ընկած է գետնին։ Աջակողմյա որմնախորշի մեջ տեղադրված քանդակը երեսնիվայր ընկած է»,– ասված է հայտարարությունում։
Նշենք, որ Երից մանկանց վանքը միջնադարյան հայ եկեղեցաշինության փայլուն օրինակ է։ Կառուցվել է 1691 թվականին, պատմական Ջրաբերդում։ Վանքը հիմնվել է Ջրաբերդի իշխաններ Մելիք-Իսրայելյանների կողմից, գուցե որպես Գանձասարի և նրա իշխանների՝ Հասան-Ջալալյանների, Խաչենի իշխանների մրցակից։