ԵՐԵՎԱՆ, 1 դեկտեմբերի – Sputnik. Գրոսմայստեր Հայկ Մարտիրոսյանը հաղթեց Կարեն Ասրյանի հիշատակիննվիրված մրցաշարում։ Այս մասին հայտնում է Հայաստանի շախմատի ֆեդերացիան։
Երկրորդ տեղը գրավեց Հնդկաստանի ներկայացուցիչ Նիհալ Սարինը, երրորդը՝ իրանցի Պարհամ Մագսուդլուն։ Լավագույն հնգյակը եզրափակեցին Գաբրիել Սարգսյանն ու Շանթ Սարգսյանը։
Մրցաշարին մասնակցել են հինգ երկրների 10 շախմատիստներ՝ Շանթ Սարգսյանը, Գաբրիել Սարգսյանը, Հայկ Մարտիրոսյանը, Արամ Հակոբյանը, Ռոբերտ Հովհաննիսյանը և Հովհաննես Գաբուզյանը՝ Հայաստանից, ինչպես նաև Նիհալ Սարինը՝ Հնդկաստանից, Պարհամ Մագսուդլուն՝ Իրանից, Բոգդան-Դանիել Դիակը՝ Ռումինիայից և Շամսիդին Վոհիդովը՝ Ուզբեկստանից։
Շախմատիստները խաղացին արագ և բլից շախմատ շրջանային մրցակարգով։ Արագ շախմատում հաղթանակի համար շնորհվում էր երկու միավոր, ոչ-ոքիի համար՝ մեկ։ Բլիցում` հաղթանակի համար` մեկ միավոր, ոչ-ոքիի համար՝ կես միավոր։
Ասրյանի հուշամրցաշարն անցկացվել է նոյեմբերի 27-30-ը Երևանի շախմատի տանը։
Կարեն Ասրյանը միջազգային գրոսմայստեր էր, Հայաստանի եռակի չեմպիոն, Հայաստանի կազմում շախմատի համաշխարհային օլիմպիադայի հաղթող։ 2008 թվականի հունիսի 9-ին Հայաստանի շախմատի ֆեդերացիան հայտնեց Ասրյանի մահվան մասին։ Մահվան պատճառը ուղեղի կաթվածն էր։ Հունիսի 11-ին նրա մահվան պատճառով դադարեցված «Շախմատային հսկաներ» մրցաշարը անվանակոչվեց նրա անունով։