ԵՐԵՎԱՆ, 27 նոյեմբերի – Sputnik. Գվինեա Բիսաուի մայրաքաղաքն ամբողջությամբ զինվորականների տիրապետության տակ է, հաստատությունների, բանկերի, շուկաների, խանութների աշխատանքը դադարեցվել է։ Այս մասին ՏԱՍՍ-ին հայտնել են Գվինեա Բիսաուում Ռուսաստանի դեսպանությունից։
«Այս պահին մայրաքաղաքն ամբողջությամբ զինվորականների տիրապետության տակ է։ Քաղաքի կենտրոնում առանձին ճանապարհներ ամբողջ երկայնքով փակ են, այդ թվում՝ ոստիկանության արագ արձագանքման ստորաբաժանումների կողմից։ Քաղաքից դուրս եկող և օդանավակայան տանող ճանապարհին անցակետեր են դրված։ Բոլոր խաչմերուկներում բազմաթիվ ռազմական պարեկներ են, երբեմն հանդիպում են ոստիկանության անցակետեր։ Փողոցներն ամայի են։ Հաստատությունների, բանկերի, շուկաների, խանութների աշխատանքը դադարեցված է»,- հայտնել են դիվանագիտական ներկայացուցչությունից։
Դեսպանությունից նշել են, որ ավտոմոբիլային տրանսպորտը, ներառյալ դիվանագիտական համարանիշներով մեքենաները, զննվում են:
«Զինվորականները քաղաքավարի, բայց համառորեն պահանջում են իջեցնել ապակիները հետևի նստատեղերը ստուգելու համար։ Բացի այդ, քաղաքի փողոցներում հայտնվել են առանց համարանիշների, մգացված ապակիներով ամենագնացներ»,- հավելել են դիվանագիտական ներկայացուցչությունում։
Ռուսաստանի դեսպանությունից ասել են, որ երկու ինտերնետ օպերատորներից աշխատում է միայն մեկը՝ «Orange»-ը:
«Սակայն ռազմական հրամանատարության ներկայացուցիչները սպառնում են փակել նաև կապի այդ ալիքը»,-նշել են դիվանագետները: Բացի այդ, նրանց խոսքով, արդեն արգելափակված են TikTok–ը և Facebook–ը (արգելված է Ռուսաստանում, պատկանում է Meta կորպորացիային, որը ՌԴ-ում ծայրահեղական է ճանաչվել)։
Ռուսաստանի դեսպանության գործունեությանը, նրա աշխատակիցների և Ռուսաստանի քաղաքացիների կյանքին վտանգ չի սպառնում: