ԵՐԵՎԱՆ, 20 նոյեմբերի – Sputnik. Ուկրաինայում միջուկային անվտանգության վերաբերյալ ՄԱԳԱՏԷ-ի զեկույցը հեռու է օբյեկտիվ լինելուց։ Այս մասին հայտարարել է Վիեննայում միջազգային կազմակերպություններում ՌԴ մշտական ներկայացուցիչ Միխայիլ Ուլյանովը:
«Ինչ վերաբերում է ՄԱԳԱՏԷ-ի գլխավոր տնօրենի «Միջուկային անվտանգություն, ֆիզիկական միջուկային անվտանգություն և երաշխիքներ Ուկրաինայում» զեկույցին։ Ցավոք, այն շարունակում է հեռու մնալ օբյեկտիվ բնույթ ունենալուց՝ պարունակվող անճշտությունների, շեղումների և քաղաքական գունավորում ունեցող դրույթների պատճառով»,-հայտարարել է դիվանագետը ՄԱԳԱՏԷ-ի Կառավարիչների խորհրդի նստաշրջանում։
Ելույթի տեքստը հրապարակվել է ՌԴ մշտական ներկայացուցչի պաշտոնական Telegram-ալիքում։
Նրա խոսքով՝ դիտարկման գաղափարը՝ ՄԱԳԱՏԷ-ի ղեկավարի կողմից ավելի վաղ հնչեցրած միջուկային անվտանգության ապահովման «յոթ հիմքերին» համապատասխան, որի վրա կառուցվում է զեկույցը, չի կարող կիրառվել Ուկրաինայում զինված հակամարտության պայմաններում:
«Ելնում ենք նրանից, որ դրա հիմքում դրված մշտադիտարկման գաղափարը՝ զինված հակամարտության պայմաններում միջուկային և ֆիզիկական միջուկային անվտանգության ապահովման «յոթ հիմունքների» համաձայն, որոնք ավելի վաղ հնչեցրել է ՄԱԳԱՏԷ-ի գլխավոր տնօրենը, չի կարող օգտագործվել իրավիճակի օբյեկտիվ և համակողմանի վերլուծության համար։ Դա, հավանաբար, նրանից է, որ «հիմքերը» երբեք չեն քննարկվել փորձագիտական մակարդակով, համընդհանուր բնույթ չեն կրել, ուստի իրական տեխնիկական խնդիր դրանք չեն կատարում»,- հավելել է դիվանագետը:
Ուլյանովը նաև նշել է, որ այդ «յոթ հիմքերը» շատ ընտրողաբար են կիրառվում են և միշտ չէ, որ կապ ունեն միջուկային անվտանգության համատեքստում գործերի իրական վիճակի հետ:
«Կրկին հիշեցնում ենք, որ ԶԱԷԿ-ը գտնվում է ռուսական տարածքում և Ռուսաստանի իրավասության ներքո։ ԶԱԷԿ-ի հարթակում ատոմային էներգիայի օգտագործման բնագավառում պետական վերահսկողությունն իրականացնում է Ռուսաստանի կարգավորող մարմինը՝ Ռոստեխնադզորը: Ինչ վերաբերում է ՄԱԳԱՏԷ-ի քարտուղարության փորձագետներին՝ նրանք այդ օբյեկտում ներկա են մեր երկրի համաձայնությամբ և հրավերով»,-եզրափակել է մշտական ներկայացուցիչը։
Հիշեցնենք՝ Զապորոժիեի ԱԷԿ-ը գտնվում է Դնեպրի ձախ ափին՝ Էներգոդար քաղաքի մոտ։ Բլոկների թվով և հաստատված հզորությամբ ամենամեծ ատոմակայանն է Եվրոպայում։ ԱԷԿ-ում տեղադրված է վեց էներգաբլոկ՝ յուրաքանչյուրը 1 ԳՎտ հզորությամբ։ Մարտ ամսից ի վեր Զապորոժիեի ԱԷԿ-ը գտնվում է ՌԴ զինվորականների պահպանության ներքո։ Էներգաբլոկներում գեներացիան դադարեցվել է 2022 թվականի սեպտեմբերին։ 2024 թվականի ապրիլից ի վեր կայանի բոլոր բլոկները գտնվում են սառը կանգառի ռեժիմում։