ԵՐԵՎԱՆ, 17 նոյեմբերի - Sputnik. Երևանի Հաղթանակ թաղամասում նոյեմբերի 15-ին հայտնաբերվել է վիրավոր «սապսան» տեսակի բազե, որը գրանցված է ՀՀ Կարմիր գրքում, իսկ նոյեմբերի 16-ին Գեղարքունիքի մարզի Մեծ Մասրիկ բնակավայրում հայտնաբերվել է լուսան։ Տեղեկությունը հայտնում է ՀՀ բնապահպանության և ընդերքի տեսչական մարմինը։
«Բազեն տեղափոխվել է Էնդեմիկ և վտանգված կենդանիների պահպանման հիմնադրամի վերականգնողական կենտրոն։ Լուսանն էլ բաց է թողնվել վայրի բնություն՝ ապահովելով նրա վերադարձը բնական միջավայր»,- ասված է հաղորդագրությունում։
Հարուցված վարչական վարույթի շրջանակներում պարզվել է, որ թռչունը ՀՀ Կարմիր գրքում գրանցված «Սապսան» տեսակի բազե է, որի թևը վնասված էր։ Լուսանի արտաքին զննությամբ որևէ վնասվածք չի հայտնաբերվել։
Տեսչական մարմնի աշխատակիցները բազեին տեղափոխել են վերականգնողական կենտրոն՝ բուժման, խնամքի և վերականգնման համար։
Հիշեցնենք, որ նոյեմբերի 9-ին Շիրակի մարզի Բագավան գյուղում հայտնաբերվել էր լուսանի ձագ, որին բնակիչները բռնել էին։ Ձագը նոյեմբերի 10-ին տեղափոխվել էր Երևանի կենդանաբանական այգի։ Արձանագրվել էր, որ ծայրահեղ ծանր վիճակում է՝ հյուծված, ջրազուրկ և խիստ սթրեսի մեջ։ Ակնադիտական գնահատմամբ` այն 5-6 ամսական ձագ է եղել։ Կենդանաբանական այգում նշել էին, որ հավանաբար ձագը կորցրել էր մորն ու հենց այդ պատճառով էլ հայտնվել էր նման վիճակում։ Այգու աշխատակիցները չէին կարողացել փրկել լուսանի ձագին, այն նույն օրն անկել էր։