ԵՐԵՎԱՆ, 10 նոյեմբերի – Sputnik. Նոյեմբերի 9–ին Շիրակի մարզում հայտնաբերված և Երևանի կենդանաբանական այգի տեղափոխված լուսանի ձագին փրկել չի հաջողվել։ Այս մասին հայտնում է Կենդանաբանական այգու մամուլի ծառայությունը։
Լուսանի ձագին Բագավան գյուղում հայտնաբերել և բռնել են բնակիչները։ Դեպքի տեսագրությունը տարածվել է համացանցում։ Տեսչական մարմինը, համապատասխան փաստաթղթավորմամբ, ձագին տեղափոխել է Երևանի կենդանաբանական այգի։
«Մասնագետները անմիջապես արձանագրել են նրա ծայրահեղ ծանր վիճակը․ կենդանին եղել է հյուծված, ջրազուրկ և խիստ սթրեսի մեջ։ Ակնադիտական գնահատմամբ՝ մոտ 5-6 ամսական ձագ էր, որը, այդ տարիքում, դեռ չի կարողանում ինքնուրույն որս կատարել կամ գոյատևել առանց մոր խնամքի»,–պարզաբանել են Կենդանաբանական այգուց։
Ցավոք, Կենդանաբանական այգու աշխատակիցները չեն կարողացել փրկել ձագին. այն անկել է այգի բերելուց մոտ մեկ ժամ անց։
Կենդանաբանականից նշել են, որ ձագը, ամենայն հավանականությամբ, կորցրել է մորը, իսկ քաղցը և սառնամանիքը ստիպել են նրան ավելի մոտենալ բնակեցված տարածքին (լուսանները սովորաբար խուսափում են մարդկանցից)։
«Տեսանյութերում երևում է, որ ձագը բռնվել է ձեռքով, ինչը հնարավոր է միայն ծայրահեղ թուլացած կենդանու դեպքում։ Ցավոք, տեղի բնակիչների ոչ միտումնավոր, սակայն չափազանց ակտիվ միջամտությունը և կենդանուն սթրեսի ենթարկելը՝ բռնելը, տեղափոխումը, աղմուկը, լուսանկարելը և այլն, միայն խորացրել են նրա ֆիզիկական և հոգեբանական ծանր վիճակը»,–նշված էէ Կենդանաբանական այգու պարզաբանման մեջ։
Այս դեպքը, մասնագետների խոսքով, ևս մեկ անգամ հիշեցնում է, որ վայրի կենդանիների դեպքում լավագույն օգնությունը չմիջամտելն է՝ անմիջապես տեղեկացնելով համապատասխան մարմիններին։
Նշենք, որ լուսանը Հայաստանում համարվում է վտանգված տեսակ։