ԵՐԵՎԱՆ, 8 նոյեմբերի — Sputnik. «Արևելք» ռազմական խմբավորման ստորաբաժանումները վերահսկողության տակ են վերցրել Դնեպրոպետրովսկի մարզի Վովչյե գյուղը։ Այս մասին հայտնում է Ռուսաստանի պաշտպանության նախարարությունը։
««Արևելք» ռազմական խմբավորման ստորաբաժանումները խորացել են հակառակորդի պաշտպանության մեջ և ավարտել Դնեպրոպետրովսկի մարզի Վովչյե գյուղի ազատագրումը», - ասվում է նախարարության հաղորդագրության մեջ։
Բացի այդ, գիշերը Ռուսաստանի զինված ուժերը լայնածավալ հարված են հասցրել Ուկրաինայի ռազմաարդյունաբերական օբյեկտներին և դրանց գործունեությանը աջակցող գազային ու էներգետիկ ենթակառուցվածքներին՝ օգտագործելով ճշգրիտ կառավարվող զենքեր, այդ թվում՝ «Կինժալ» հիպերձայնային հրթիռներ։ Պաշտպանության նախարարությունից ընդգծել են, որ բոլոր թիրախները խոցվել են։
«Ռուսաստանում քաղաքացիական օբյեկտների վրա ուկրաինական ահաբեկչական հարձակումներին ի պատասխան՝ երեկ երեկոյան Ռուսաստանի զինված ուժերը լայնածավալ հարված են հասցրել Ուկրաինայի ռազմաարդյունաբերական և էներգետիկ օբյեկտներին՝ օգտագործելով հեռահար ճշգրիտ կառավարվող օդային, ցամաքային և ծովային զենքեր, այդ թվում՝ «Կինժալ» հիպերձայնային հրթիռներ, ինչպես նաև հարվածային անօդաչու թռչող սարքեր։ Բոլոր նշանակված թիրախները խոցվել են», - հայտնել է ՌԴ պաշտպանության նախարարությունը։
ՌԴ ռազմական գերատեսչությունից հավելել են, որ մարտերը շարունակվում են նաև Խարկովի մարզի Կուպյանսկի մոտակայքում, որտեղ 6-րդ բանակի գրոհային ստորաբաժանումները ոչնչացնում են Ուկրաինայի զինված ուժերի շրջապատված խումբը։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Մարտական գործողություններն ընթանում են մինչ օրս։
Ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։