ԵՐԵՎԱՆ, 6 նոյեմբերի – Sputnik. Գիտնականները զգուշացնում են, որ նոյեմբերի 7-ին սպասվում է տարվա ամենաուժեղ գեոմագնիսական փոթորիկը։
Մագնիսական փոթորիկները Երկրի մագնիսական դաշտի ժամանակավոր և ուժեղ խանգարումներն են։
Փոթորիկները Երկիր են հասել արդեն նախորդ գիշերվանից։ Սակայն վաղվա կանխատեսման համաձայն` լինելու է փոթորկի G3-G4 մակարդակ, այսինքն ուժեղից մինչև ամենաուժեղ։ Այս միջակայքը, ըստ ՌԴ գիտությունների ակադեմիայի տիեզերական հետազոտությունների ինստիտուտի Արեգակնային աստղագիտության լաբորատորիայի և ՌԳԱ Սիբիրյան մասնաճյուղի Արեգակնային-երկրային ֆիզիկայի ինստիտուտի աշխատակիցների, ամենայն հավանականությամբ կտեղափոխվի G4-G5 միջակայք։
G-ցուցիչը մագնիսական փոթորկի ուժգնության հինգ միավորանոց սանդղակն է։ Այս սանդղակով մագնիսական փոթորիկները դասակարգվում են G1–ից (թույլ) մինչև G5 (ծայրահեղ ուժեղ) մակարդակների։
Եղանակային փոփոխությունների նկատմամբ զգայուն մարդիկ կարող են գլխացավեր ունենալ, խրոնիկ հիվանդությունները կսրվեն: Հնարավոր բացասական ազդեցությունները նվազեցնելու համար մասնագետները խորհուրդ են տալիս քնել 7-8 ժամ, խուսափել չափից մեծ ֆիզիկական ակտիվությունից` հատկապես ինտենսիվ մարզումներից, նվազագույնի հասցնել կոֆեինի, ալկոհոլի և ծանր սննդի օգտագործումը, ինչպես նաև ժամանակ հատկացնել հանգստին, թուլացնող վարժություններին և զբոսանքին: