ԵՐԵՎԱՆ, 6 նոյեմբերի – Sputnik․ Դեպի Հայաստան նոր երթուղիներով ներկրումների դեպքում իրավիճակն անսպասելի և դինամիկ զարգացումներ է ունենում, և ամեն օր բան է փոխվում։ ՀՀ կառավարության նիստից հետո ճեպազրույցի ժամանակ այս մասին ասաց վարչապետ Նիկոլ Փաշինյանը` անդրադառնալով գիշերը Ադրբեջանի և Վրաստանի տարածքով Հայաստան հասած ռուսական ցորենի խմբաքանակին։
Ավելի վաղ հայտնել էինք, որ տարանցիկ սահմանափակումների վերացումից հետո այս գիշեր ռուսական ցորենի առաջին խմբաքանակը՝ 15 վագոն (մոտավորապես 1000 տոննա), Ադրբեջանի տարածքով հասավ Հայաստան։
«Ի սկզբանե նախատեսված էր, որ Ղազախստանից պետք է գա առաջին գնացքը։ Ընկալումն այդպիսին էր, սակայն դրանից հետո պարզվեց, որ Ադրբեջանը նման հնարավորություն տալիս է նաև Ռուսաստանից եկող գնացքներին, և հիմա ՌԴ–ից որոշակի ապրանքախմբերի` այդ ճանապարհով Հայաստան արտահանելու վերաբերյալ հայտեր են գեներացվում»,– ընդգծեց նա։
Փաշինյանի խոսքով` ստացվում է, որ ապրանքների տեղափոխման հոսքերը սկսում են վերադասավորվել Ադրբեջանով Հայաստան հասնելու համար, մինչդեռ Ղազախստանից նախատեսված շարժակազմը դեռ տեղ չի հասել։
«Մինչև հիմնական շարժակազմը տեղ հասնի, ես ենթադրում եմ, որ գուցե էլի շարժակազմեր լինեն։ Իրավիճակն անընդհատ փոխվում է, քանի որ նորանոր հայտեր են առաջ գալիս։Հիմա պետք է գործնականում պարզվի, թե հակառակ ուղղությամբ ապրանքներն ինչպե՞ս են հոսելու»,– ասաց վարչապետը։
Անդրադառնալով այս հարցում Ռուսաստանի ակտիվությանն ու մասնակցությանը` Փաշինյանը հայտարարեց, որ ողջունում է Ռուսաստանի ակտիվությունը երկաթուղու գործարկման հետ կապված։
«Ուզում եմ բոլորիս հիշեցնել` երբ օգոստոսի 8–ից հետո հնչում էին, այդ թվում` փորձագիտական գնահատականներ, որ Ռուսաստանի, Իրանի համար սրանք նեգատիվ զարգացումներ են, մենք ասում էինք ո՛չ, սա նպաստելու է Հայաստան–Ռուսաստան հարաբերությունների զարգացմանը և խորացմանը։ Դրանից 3 ամիս հետո մենք ունենք կոնկրետ զարգացումներ։ Մենք ողջունում ենք այդ ակտիվությունը, որը համապատասխանում է օգոստոսի 8–ից հետո զարգացումներին և մեր պատկերացումներին»,– նշեց ՀՀ վարչապետը։
Նա նորից վերահաստատեց հայկական կողմի պատրաստակամությունը` ապահովելու Մարգարա–Կոռնիձոր և հակառակ երթուղով թուրքական և ադրբեջանական բեռնատարների անցումը Թուրքիայից Ադրբեջան և հակառակ ուղղությամբ։
Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան:
Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։
ՀՀ վարչապետ Նիկոլ Փաշինյանը սեպտեմբերի 11-ին հայտարարեց, որ ՀՀ–ն ոչ թե 99 տարով հողը վարձակալության է տալիս ամերիկյան կողմին, այլ տալիս է կառուցապատման իրավունք։