ԵՐԵՎԱՆ, 3 նոյեմբերի - Sputnik. Ծափաթաղում անհետացած 3-ամյա երեխայի սպանության դեպքի առթիվ նախաձեռնված քրեական վարույթի նախաքննության ընթացքում կատարվել է դիակի արտաքին զննություն: Դիակի մարմնի, գլխի շրջանում հայտնաբերվել են մարմնական վնասվածքներ: Այս մասին հայտնում է ՀՀ ՔԿ խոսնակ Կիմա Ավդալյանը։
Ինչպես հայտնել ենք, այսօր ավելի վաղ ՀՀ ՆԳ նախարար Արփինե Սարգսյանը հայտնել էր, որ Ծափաթաղ գյուղում կորած 3 տարեկան Տիգրան Օվանեսովին, նախնական տվյալներով, սպանել է հայրը` խեղդամահ անելու ճանապարհով։
ՀՀ ՔԿ խոսնակը նշել է, որ նախաքննության ընթացքում նշանակվել է դիակի դատաբժշկական փորձաքննություն:
«Մեկ անձի նկատմամբ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 2-րդ մասի 3-րդ, 5-րդ և 9-րդ կետերով (սպանությունը): Վերջինս ձերբակալվել է»,–նշել է Ավդալյանը:
Հիշեցնենք` ոստիկանությունը հոկտեմբերի 27-ին` ժամը 18։00-ի սահմաններում, հաղորդում է ստացել, որ Գեղարքունիքի մարզի Ծափաթաղ գյուղի բնակիչ, 2022 թվականին ծնված Տիգրան Օվանեսովը ժամը 16.30-ի սահմաններում կորել է։
Նրա որոնումներում ներգրավված էր շուրջ 500 ոստիկան, փրկարար, կամավոր։
Երեխայի դին հայտնաբերվել էր նոյեմբերի 2-ին՝ Ծափաթաղ գյուղին հարակից Ջիլ գյուղի ցուցանակից մոտ 60 մետր հեռավորության վրա՝ դաշտամիջյան հատվածում։