ԵՐԵՎԱՆ, 1 նոյեմբերի – Sputnik. Գազայի հատվածում հրադադար հաստատելուց հետո զոհվածների թիվը հասել է 226-ի, վիրավորվել է ավելի քան 590 մարդ: Տեղեկությունը հայտնում է ՌԻԱ Նովոստին` հղում անելով տեղի առողջապահության նախարարությանը։
Միայն վերջին 2 օրում Գազայի հատվածի հիվանդանոցներ են տեղափոխվել 9 վիրավորներ և 22 զոհվածների մարմիններ:
Այսպիսով` 2023 թվականի հոկտեմբերի 7-ից ի վեր զոհերի թիվը գերազանցել է 68,8 հազարը, ավելի քան 170,6 հազար մարդ է վիրավորվել։
Հիշեցնենք` Իսրայելի և ՀԱՄԱՍ-ի միջև կնքված հրադադարի մասին համաձայնագիրն ուժի մեջ մտավ հոկտեմբերի 10-ին: ՀԱՄԱՍ–ը գործարքի շրջանակում ազատ արձակեց 2023 թվականի հոկտեմբերի 7-ից Գազայում պահվող 20 պատանդներին: Բանտարկյալների գործերով պաղեստինյան գրասենյակը հաստատեց, որ Իսրայելի իշխանություններն էլ, հետևելով պայմանավորվածությանը, ազատ են արձակել 1718 բանտարկյալի, որոնք վերադարձել են Գազա, ինչպես նաև ցմահ ազատազրկման կամ երկարատև ժամկետով դատապարտված 250 պաղեստինցի բանտարկյալների: